Chelsea leh Mourinho an beih rawn em?

Jose Mourinho chuan tun hnaiah mi zawng zawngin Chelsea an beih rawn niin a sawi! Southampton an draw ṭumin a âng chhuak a, Tottenham Hotspur an hneh loh ṭumin na takin referee a sawisel bawk.

Min beih rawn

December 28-ah Southampton nen 1-1 in an inhnehtawk a, point hnih an hloh. He inkhelh zawh hian Mourinho chuan mi zawng zawngin Chelsea chu an beih rawn nia a hriat thu a sawi chhuak a, lungawi lo hle.

The Special One inti ngat chuan, "Media, commentator leh manager dang zawng hian min beih rawn ni berin ka hria. Eng vanga min beih rawn nge ka hre lo a, eng ang pawhin ṭang rual se engmah mah ka ngai lo e," a ti.

He inkhelah hian referee Anthony Taylor chuan Chelsea midfielder Cesc Fabregas chu penalty hlawh tuma tlu luiah puhin yellow card a pe a, hei hi Mourinho chuan a hrethiam thei lo. Fabregas chu a tlu der lo a, penalty hlawh ngei tur a nih thu a sawi a, a player-te tluder ṭhin anga an lan theihna turin midang zawng an ṭang rual a, referee-te an hmu niin a sawi.

Chelsea boss chuan West Ham United mana­ger Sam Allardyce-a'n Branislav Ivanovic a tlu der anga a sawi chuan Southampton leh Chelsea inkhelh ṭuma Fabregas-a chungchangah nghawng a nei niin a puh a, "West Ham nen kan inkhelh khan Sam khan Ivanovic kha tlu derah a puh. Tunah Southampton nen kan inkhel a, referee-in thutlukna pawimawh tak siam tur a nei a, a tisual ta chiah a ni. Sam khan behchhan nei miah loin Chelsea player-te tlu der ṭhinah a puh a, coach hrang hrangin hetiang hi an sawi bawk a; tunah kan tuar ta chiah a, penalty hlawh turin yellow card kan chawi phah ta a ni," a ti a, a lungawi lo.

A lungawi thei lo

Penalty a beiseina inkhelah point hnih an hloh a, White Hart Lane-ah an kal a, an chak lo. Chelsea-in goal nga an chhuah a, Manchester City-in an umphak ta chiah bawk a, he inkhelh banah hian Mourinho chuan a lungawi loh thu bawk a sawi chhuak.

Kumthar nia inkhelh banah Chelsea boss chuan, "1-0 in hma kan hruai a, goal hnihna thun theihna remchang kan neih chu referee-in min pe lo," a ti a; si khata hma an hruai laia Spurs defender Jan Vertonghen-a kuta ball-in a per chu referee Phil Dowd chuan penalty a pe lo.

He inkhelh hma chiah hian Chelsea chu midang zawng inthurualin an beih rawn niin a sawi a, he inkhela a penalty beisei an pe lo hi an beih rawn vang a nih leh nih loh an zawt a, "He zawhna hi ka chhan duh loh zawhna a ni e," a ti hmak.

Inkhelh zawha an kawmnaah Mourinho chuan, "Thil thleng tur hi sawi lawk theih a ni ngai lo a; nimahsela tunah chuan sawi lawk theih chin hi ka nei tawh a ni," a ti a, referee-in Chelsea chu peanlty an pe duh loah a ngai tawh.

November thla tirah point kuaa hmahruaiin an vawr lal len a, tunah erawh City nen an point leh goal difference a inang ta. Chelsea leh City inûm a hmuhnawm chho zel ang a, Mourinho titi a ngaihnawm dawn chauh ang.