Euro 2016 Zaninah British Derby; England leh Wales an incho

Euro 2016 group stage-ah England leh Wales an awm dun tih hriat a nih rualin khawthlang media-te titi tui ber an ni nghal. United Kingdom rorelna hnuaia ram pahnih inhmachhawn tur hi British mipui nghahlelh a ni.

Wales innghahna Gareth Bale-a'n England player zingah Wales tana khel pha tur khawpa player ṭha an awma a hriat loh thu a sawi a, hei hi England fan-te a run hle - zanin dar 6:30-ah English player-ten an fan-te rilru na thawidam nan Wales hneh an tum ang.

England dinhmun

England-in an match hmasa berah hun tawp dawna goal an chhuah avangin Russia nen 1-1 in an inhnehtawk a, champion beisei ngam tan zaninah point hloh nawn a thiang tawh lo.

Roy Hodgson-a'n Russia an hmachhawn ṭumin 4-3-3 formation a hmang a, tlar hmaah Harry Kane chu striker niin a sir aṭangin Adam Lallana leh Raheem Sterling-ten an thlawp. Sterling-a'n beisei a phak lo a, Jamie Vardy-a'n Wales lakah Manchester City winger aiah inkhel bul a ṭan a nih pawhin a mak lo ang.

Hetihrual hian Harry Kane sawi hmaih theih a ni lo - Tot-tenham striker hian Russia lakah a khel chhe takzet a, penal-ty area-ah vawi khatmah ball a tawk lo! Goal shot vawi thum chiah a nei a, hei hi box pawn aṭang vekin a ni. Premier League top scorer hian zaninah beisei a phak lo leh a nih ngat chuan English mipuiten a lakah beiseina an nghat ngam tawh lo ang.

Midfield-ah captain Wayne Rooney chu roreltu a ni a, Manchester United striker hian Wales an hmachhawn hunah pawh midfield-ah tho hmun a chan rin a ni. Russia laka freekick pet luttu Eric Dier-a lakah English mipui beiseina a sang leh dawn.

Wales dinhmun

Chris Coleman-a'n Slovakia an hmachhawn ṭumin 3-4-3 formation a hmang a, attacking football a naute a khelhtir. Slovakia laka 2-1 a an chak
ṭumin goal hmaa an hlauhawm tluk zetin an goal bulah Slovakia an hlauhawm ṭhin a - zanina Coleman-a ruahmanna siam dan hmuh a châkawm tawh hle.

Gareth Bale-a'n Wales in-nghahna a nihzia pholangin an match hmasa berah freekick a pet goal a, Real Madrid forward hi England tlarhnung tan ngaihthah a thiang lo. Arsenal midfielder Aaron Ramsey-a'n match hmasa berah vei lam sir aṭangin Bale a thlawp a, Wales goal hnihna Hal Robson-Kanu-a'n a khung theih nana player thawhhlawk a ni.

Wales first keeper Wayne Hennessey-a'n match hmasa berah hliam vangin Slovakia a hmachhawn thei lo a, a aia ding Liverpool third choice keeper Danny Ward a che chhe lo. Zaninah erawh Crystal Palace keeper hi a dam hman a nih chuan goal a ven a rinawm.

Bale ven tum lo Rooney

Wales-in khawvela player man to ber Gareth Bale kawl mah se Tottenham winger hlui hi a hranpa a ven an tum loh thu Wayne Rooney chuan a sawi. England captain chuan, "Bale hi khawvela players ṭha zual panga zingah a tel phak ang. Mahse, Bale ringawt buaipui hman kan nih loh avangin kan game pangngai khel turin kan kal chhuak mai dawn a ni. Players ṭha tak kan kan kawl ve ṭeuh tho a, inkhel hmuhnawm tak a ni ang," a ti.

Bale-a'n England player aia ram hmangihna rilru an put nasat zawk thu a sawi a, Liver-pool midfielder Adam Lallana chuan Southampton-a a ṭhanlen pui player thusawi hi chhangletin , "Gareth hi ka hrechiang a, a rilru tak takin a sawi lo ang. Inkhelh hmaa thu lengvak awm hi chu a nih dan phung ve reng tur a ni a, tunah chuan khelmualah kan thusawite thlentir a hun tawh a ni," tiin ṭawngkam ringawtin inkhel a chinfel loh thu a sawi.

Wales an zam lo

Gareth Bale-a'n England player zingah Wales tana khel phak an awm a rin loh thu a sawi hnu lawkah England chu team ṭha tak nimah se an hlauh loh thu sawiin,"England hi keini aia ram lian zawk an nih avangin players pawh duhthlan tur an ngah zawk. Mahse, tun hnaiah nasa takin hma kan sawn a, England nen hian kan inhnaih tawh hle. Team ṭha tak an ni a, keini pawh team ṭha tak kan ni. Min hneh theih an ring a nih chuan keini pawhin kan hneh theih kan ring ve tho," tiin England hmaah a zam lo.

Boruak a sang

England leh Russia inkhelh ṭuma buaina a chhuah avangin venhimna lam an uluk lehzual a, inkhel boruak sang tur British Derby-ah phei chuan venhimna hna thawktu police leh private security 2400 zet an awm dawn!

Team pahnih inhma-chhawnna tur Stade Bollaert-Delelis innghahna khawpui Lens-ah chuan nizan dar 10:30 aṭang khan Zirtawpni zan dar 10:30 thleng zu zawrh phal loh a ni a, beer alcohol 5% aia tlem awmna chu plastic no emaw paper cup chauh hmanga hralh phal a ni thung.

England manager Roy Hodgson chuan, "Euro 2016 khel turin theihtawp kan chhuah a, a tawp thleng awm kan duh. Kan fan-te min ṭawiawm ṭhin-naah kan lawm a, mah se buaina chawk chhuak zawnga khawsa lo turin ka duh a ni. Football vang ni loin Euro 2016 aṭanga pet chhuah kan ni ang tih ka hlau a, kan thiamna hmanga Euro kan khelh zel theih nan fan-te buaina siam lo turin ka ngen a ni," tiin fan-ten buaina an siam chuan disqualify mai an nih a hlauhthawnawm thu a sawi.