Manchester United-in Engtin nge Van de Beek an hmin?

August 31 zan khan Donny van de Beek-a'n Manchester United player ni turin medical a patlang a, he thu i chhiar meuh chuan Manchester United jersey nena a thlalak hmuh tur a awm tawh ang.

English club hian kum 23 mi Dutch midfielder lalut tur hian euro maktaduai 40 an seng a, a chet ṭhat dan a zirin Ajax hnenah pound maktaduai nga an la pek belh theih bawk.  Van de Beek hian kum nga chhung atan contract a ziak a, Ole Gunnar Solskjaer-a'n tun nipui transfer-a a player lakluh hmasa ber a ni.

Manchester United-in 2007 Europa final-ah Ajax 2-0 in an hneh a, hemi ṭum hian Donny van de Beek pawh minute 70-naah khelmualah a rawn inlan. Amaherawhchu hetihlai hian Van de Beek-a'n United mit a la tlung pha lo.

2018-19 season-ah Erik ten Hag hoin Ajax hi Eredivsie leh KNVB Cup-ah an champion a, khawvel huapa an larpui erawh Champions League-a an khelh dan a ni. Ajax hian Bayern Munich awmna group aṭangin knockout stage an lut a, Europe club lian Real Madrid (5-3) leh Juventus (3-2) a an hneh hnuah away goal rule hmangin semifinal-ah Tottenham Hotspur lakah an vanduai. Spurs chakna goal hi injury time minute ruknaa lut a ni.

Van de Beek hian Juventus lamah goal pawimawh a khung bakah London-a Spurs 1-0 a hneh ṭumin goal awmchhun a khung bawk. Ajax team-a hming langsar zawk erawh  Matthijs de Ligt leh Frenkie de Jong te an ni a, anni pahnih hi Juventus leh Barcelona ten pound maktaduai 63 leh 65-in an lei.

London-a Tottenham an hneh ṭum hian Van de Beek aiawh ten hetihlaia Arsenal head of football Raul Sanllehi leh West Ham director Mario Husillos bakah Tottenham chief scout Steve Hitchen te an hmu a. Heng club pathum an hmuh zawh hian London-a Manchester United office-ah Matt Judge an hmu bawk.

Judge hi United-ah head of corporate development a ni a, tun hnaiah erawh transfer a awm a, club aiawha dawrtu ber a ni. United hian Van de Beek hi an lakduh ber ni lo mah se Judge hi Van de Beek aiawhte nen an inkar a ṭha hle. Netherlands-a United scout Roy Beukenkamp chu club leh player aiawh inbiakna kawngah a ṭangkai bawk.

August thla tirah United-in lak tumin rilru an siam fel a, Greece-a chawlh hmang haw hlim Van de Beek pawh an hriattir. Hemi ṭumah erawh en thla satliah ni tawh loin contract an zawrh.

Van de Beek hi kum nga chhung atan kar khata £100,000 chuang hlawh turin an sawm a, a contract hi kum khat atan pawhsei theih dan a awm a. Ajax lam pawhin bonus zawng zawng nen transfer fee aṭangin pound maktaduai 40 an chang thei dawn.

Dutch midfielder hi sum chungchangah a lungawi a, amhaerawhchu Ole Gunnar Solskjaer biak phawt a duh. Norwegian manager hian Van de Beek hi Paul Pogba leh Bruno Fernandes te kiangah hmun a awm thu a hrilh a, a goal khung theihna lai chu an duh chhan pakhat a nih thu a hrilh bawk.

Van de Beek hi midfield-ah no. 6 role a chelh theih rualin no. 8 leh no. 10 ah a khel thei bawk a, Solskjaer hian Frank Lampard leh Paul Scholes te anga midfield 

aṭanga goal khung thei turah an ngai. United centre midfielder-ten season thum chhungin penalty chhiar tel loin goal 48 an khung. Van de Beek hian season thum chhungin match 133 aṭangin goal 40 a khung a, penalty aṭanga khung a nei lo - Pogba leh Fernandes aiin record a nei ṭha zawk!

Ajax sporting director Marc Overmars-a'n Europe club lian te awh tur player a kawl tih a hria, De Jong leh De Ligt te manah pound maktaduai 130 vel an lakluh hnuah pawh Hakim Ziyech, Andre Onana, Nicolas Tagliafico, David Neres leh Dusan Tadic te a kawl a, sum lakluhna tur ṭha tak vek an ni.

2019 Champions League zawh khan Borussia Dortmund an lang a, amaherawhchu German club hian Dutch club phutna zat an ngam lo. Real Madrid an thleng thui zawk - Spanish club hian Ajax nen pound maktaduai 50-in inremna an nei hman.Dutch club-in pound maktaduai 50-in hralh phal mah se Spanish club-in an ti khawtlai. Los Blancos hian nikum nipui transfer-a Van de Beek lalut tur hian player ṭha ṭhenkhat hralh an ngai a, an sum mamawh zat an tuak ngah hman lo. Real Madrid hian Dutch midfielder hi an la ngaihven zui a, January thla khan 2019-20 season tawpa lalut turin inremna an siam.

Amsterdam-ah Madrid aiawhte leh Van de Beek an indawr a, Dutch midfielder aiawhte hian Madrid an tlawh leh bawk. Inremna an ziak fel a, medical erawh nipuia tih chauh tur a ni thung. Chutihrualin Van de Beek aiawhte hian an inremna hi a hlawhchham palh takin club dang erawh an dawr pah reng.

Amaherawhchu Covid-19 vangin Spanish club hian an tum an thlak a, transfer lian tham tih an tum lo. Real Sociedad-a loan hmanga kaltir Martin Odegaard an ko let a, Van de Beek lakluh an tum ta lo. Spanish club-in thil awm dan Dutch midfielder an hrilh hian Van de Beeek hi a lung ni lo hle. 

Ajax hian Van de Beek duhtu Tottenham, Juventus, Atletico Madrid leh Arsenal te thil awmdan an hriattir vel zel a, chutihrulain Gunners erawh an sum dinhmun vang leh Champions League an khelh phak loh avangin an tan lak a harsa thung.

Tottenham leh Barcelona an rawn lang a, Catalan club manager thar Ronald Koeman-a staff-te leh Van de Beek te an inhriat ṭhat avangin beisei pawh an nei sang hle. Amaherawhchu Solskjaer-a'n Van de Beek a hmin a, chutihrualin United hi an vannei tel bawk.

Ajax CEO Edwin van der Sar-a'n a club hlui Manchester United-a kal turin Van de Beek hi thurawn a pe a, a bialnu Estelle-i pa Arsenal legend Dennis Bergkamp-a'n midfielder tana Premier League-a kal ṭhatna a hrilh bawk. Dutch midfielder thurawn petu dang a pa, a agent, Ajax tana a khelhpui Daley Blind ten Man United lam an sawi hmuh vek.

Hetia sawmtu tam tak awm karah hian Ajax manager tih loa club manager betu awmchhun chu Ole Gunnar Solskjaer chauh a ni. Van de Beek-a ṭhian ṭha tak pakhat chuan, "Coach zawngin an duh chhan an sawi thei ang, chutihrualin coach danglam bik chauhin an duh chhan an sawifiah thei. Ole hian Donny hi a hmin a ni," tiin a sawi.

United defender Timothy Fosu-Mensah leh Van de Beek te hi Ajax youth team tan an khel ho ṭhin a, chutihrualin English club-ah hian Dutch player 12 zet an lo khel tawh. Chungte chu Arnold Muhren, Jordi Cruyff, Raimond van der Gouw, Jaap Stam, Ruud van Nistelrooy, Edwin van der Saar, Robin van Persie, Alexander Buttner, Daley Blind, Memphis Depay, Fosu Mensah leh Tahith Chong te an ni.

Andre van de Beek leh Gerdina van de Beek te nupa karah Donny van de Beek hi April 18, 1997 khan Nijkerkeveen, Netherlands-ah a piang. Van De Beek te hi khawsak lamah chhungkaw vantlang an ni a, a nau Rody van de Beek te nen Nijkerkeveen-a an huan thlamah (farmhouse) an seilian a, ar vulh chhungkua an ni.

A seilennain a zir bawk a, Donny hian a naupan laiin football lam ngaituah loin thingkung lawn leh ransa nena infiam chu nuam a ti thung. Kum li a nihin Donny hi a pa Andre-a'n Ajax Stadium-ah inkhel en turin a hruai a, infiamna lamah tui chho nghalin Veenshce Boys-ah a inziak lut.

Donny hian kum nga a nihin lehkha a zir ṭan a, zirlai vantlang a ni a, ṭhiante zinga inkiltawih chi a ni lo a, an school-ah pawh a tlangnel hle. Kum engemawti chhung chu Veenshce Boys-ah hian Donny hi a inzir chho a, ball pass dan bakah tuna a khelh dan tam tak a inzirna hmun chu Veenshce Boys hi a ni.

Dutch club lian Ajax-in Donny hi an hmelhriat vat a, kum 2008 khan kum 11 mi niin an lalut. Dutch midfielder hi Ajax academy-ah pawh player hmabak nei êng zinga mi a ni chho a ni.

Donny hi January 2005-ah Jong Ajax (reserve team) in Sparta Rotterdam an hmachhawn ṭumin a inlan ṭan. Thla hnih hnuah Ajax manager Frank de Boer chuan senior team-a inhliam an awm avangin ADO Den Haag an hmachhawn ṭumin squad-ah a ko a, a chhawr lo thung.

2014-15 season hian Van de Beek hian AFC Ajax Talent of the Future award a dawng. November 2015-ah Europa League-a Celtic an hmachhawn ṭumin Donny hi a inlan a, 2-1 in hnehna an chang. Ni thum hnuah Eredivisie-a PEC Zwolle nena an inkhelh ṭumin a khel leh bawk.

January 2016-ah  John Heitinga leh Yaya Sanogo te an chhuak a, De Boer-a'n first team-ah Donny a dah nghet a, Under 19 tan UEFA Youth League-ah a khel reng bawk. Hetih hunlai hian Barcelona nen pawh sawi zawm a ni.

Ajax-in 2016-17 season-ah manager thar Peter Bosz an nei a, Dutch manager hnuaiah pawh hmun pawimawh a chang chho. Europa League-a final an thlenna kawngah hmun pawimawh a chang pha a, Erik ten Hag hnuaia 2018-19 season-a semifinal an luh khan a ṭangkai lehzual. 

Van de Beek hian Ajax hi Eredivisie, KNVB Cup leh Johan Cruyff Shield-ah vawi khat ṭheuh a champion pui a. Netherlands tan kum bithliah inelna hrang hrangah a tel a, UEFA Euro U17 C'ship-ah kum 2014 khan pahnihna a nihpui a, senior team-ah pawh tel tawhin Oranje tan vawi 10 a inlan tawh a ni.