Tualchhung football inelna lian pathum a hnai
Mizoram Premier League Season 5ṭan hmain tualchhung football club-te tan Independence Day Celebration Football Tournament leh MFA Super Cup khelh a ni dawn.
I Day Football hi mipa leh hmeichhe tana buatsaih niin champion lai chu Aizawl FC an ni ve ve a, MFA Super Cup-a champion lai erawh Bethlehem Vengthlang FC an ni.
Tualchhhung football-ah transfer hawn lai a ni a, player inchuh thawm a ri ring hle - ṭum dang aiin transfer a 'hot' a tih theih! MPL club ten training an ṭan chho tawh a, Aizawl FC midfielder Yuta Kinowaki-a'n Chhinga Veng FC practice a zawm vete chuan sawi zui a hlawh a, Chanmari FC lamin Mizo player
ṭha an lakluh tam avanga Aizawl FC rorelna hnuaia kun reng an tum lo tih a chiang reng tawh bawk.
Hetihlai hian MPL leh I Day Football champion lai Aizawl FC chu eng inelnaah pawh champion tura rinkai an la ni reng. Team enkawltuten club president thusawi 'A lungthu kim nan MPL kan champion leh tur a ni' tih chu an bawhzui chhoh dawn avangin Mizo club zinga I League khel hmasa ber hi an awm mai mai lo ang.
I Day Football leh MFA Super Cup hi MPL atana inenchhina ṭha tak a ni dawn a, tualchhung football a ngaihnawm chho dawn.
Independence Day Football
Independence Day Celebration Football Tournament 2016-ah hian Mizoram Premier League club pariatte bakah state pawn aṭangin team pahnih dang sawm tum an ni a, July 25-a tan hman tura ruahman a ni.
Tunah hian All India Football Federation Under 19 team nen indawr tawh a ni a, anni lam pawhin a thuphungin tel an duh thu an sawi tawh a, lehkhaa tihchianna nghah mek a ni. Hei bakah hian state pawna team ṭha tak pakhat dang sawm tum a ni a, indawr mek a ni.
I Day Football-ah hian champion team-in Rs 1,00,000 leh trophy an dawng ang a, pahnihnain Rs 50,000 an dawng ang. Semi finalist pahnihin Rs 10,000 an dawng ang a, Fair Play Award siam a ni a, Rs 10,000 a keng tel ang. Inkhelh apiangin a chakin Rs 1,500 dawngin a chak loin Rs 1,000 zel an dawng ang a, inhnehtawkin Rs 1,000 ve ve an dawng ang. Hei bakah hian Top Scorer leh Best Player thlan an ni ang a, trophy bakah Rs 3,000 ve ve an dawng ang.
MFA Super Cup 2016
Kumin aṭangin MFA Super Cup khelh dan tihdanglam a ni dawn a, MFA hnuaia club inziak lut a duh apiang tan tel theih a ni a, champion-in trophy bakah Rs 1,50,000 an dawng ang.
All Mizoram Open Football Tournament a nih tawh dawn avangin MFA Super Cup-ah hian eng football club pawh a tel theih tawh ang. Entry fee Rs 500/- a ni a, tel tumte chuan June, 2016 ral hmain MFA Office-ah entry fee pek luh tur a ni ang.
MFA Super Cup-ah hian MPL club pariatte chu Round of 16 lut saa dah an ni dawn a, a dang zawng team tel apiangin hmun ruak awm pariat hi an inchuh ang a, knock out system-a khelh tur a ni. MFA Super Cup hi August 27, 2016-a final khelh tura ruahman a ni a, a ṭan hun tur erawh team tel zat azirin siam rem tur a ni ang. Team tel an
ṭhathnem chuan July, 2016 thla laihawl vel aṭangin MFA Super Cup hi khelh ṭan tur a ni ang a, August 16, 2016-ah Round of 16 khel ṭan hman tura ruahman a ni.
Inkhelh apiangin a chak zawkin Rs 1,000 an dawng zel ang a, final-a a chak zawkin Rs 1,50,000 an dawng ang a, a chak lo zawkin (pahnihnain) Rs 50,000 an dawng thung ang. MFA chuan Mizoram chhunga district hrang hranga football club zawng zawngte MFA Super Cup khel turin a sawm a ni.
I Day Women Football
Independence Day Football Tournament 2016-ah hmeichhe tan inelna buatsaih a ni bawk dawn. Hmeichhe lam hi team 12 tel theihna tura ruahman a ni a, July 23-a ṭan hman tura tih a ni. Hmeichhe lamah registered club an la awm chiah loh avangin team 12 tel turte hi hming pe lut hmasa 12 an ni mai dawn a - football club, games and sports association, sporting club, school, college, YMA, MHIP leh eng pawl hming pawhin a tel theih ang.
I Day hmeichhe tournament-a tel duhte chuan MFA Office-ah hming pek luh theih a ni a, entry fee Rs 500/- pek tur a ni ang. Tournament kalphung, lawmman zat leh a kimchang chu Women Committee lamin an bawhzui ang.