Ronaldo a bo! Iceland-in Portugal an chelh ding

Thawhlehni zan Euro 2016 inkhel chu 'beisei loh' thlen zan a ni - Cristiano Ronaldo hoa fehchhuak Portugal-in mipui 330,000 lek chhena ram Iceland an hneh zo lo a, 1-1 in an inhnehtawk.

Austria leh Hungary inhma-chhawn hmain chak tura rinkai zawk chu hming langsar ngah zawk Austria an ni - mah se inkhel a zawh meuh chuan 2-0 in Hungary an chak a, Euro 2016 a ngaihnawm chho zel.

Inkhel chu

Iceland tan inkhelh ṭan hnu lawkah Gylfi Sigurdsson chuan goal khungna hun ṭha nei mah se a goal shot dan per a nih hnuah a per let pawh a pet goal thei chuang lo. Beisei kai zawk Portugal-in minute 31-naah goal an khung ta nge nge, Nani chuan Andre Gomes ball pek chu awlsam takin a lo khung.

Goal dang lut loin chawlh-lawk hman a ni a, second half ṭan aṭanga minute ngana lekah Portugal beisei loh thil a thleng. League One club Charlton Athletic midfielder Gudmundsson chuan vengtu nei lo Birkir Bjarnason hmu fuhin ball a cross phei a, FC Basel midfielder hian harsatna nei loin goal-ah a chantir. Hun tawp thlengin team pahnihin goal an khung tawh lo a, 1-1 in an inhnehtawk.

Khawiah nge Ronaldo?

Champions League nomawi chawi hlim Ronaldo-a'n ram tana inlan hnem ber Figo record nihrual turin a match 127-na a khel a, a team-in an mamawh zanah goal erawh a khung thei lo.

Iceland lakah Ronaldo hian goal shot vawi 10 zet a nei a, heng zingah hian target-a shot erawh vawi khat chiah a nei thung. Real Madrid forward hian Pepe ball pass ṭha tak a khawih hman loh bakah yard 20 vel aṭanga a volley chu goal post pawn lamah a chhuak a, hun tawp dawnah goal khungna hun ṭha nei mah se a ball tauh chu Iceland goalkeeper Hannes Thor Halldorsson-a'n a dan sak.

Season ruk chhung Real Madrid tan season tin goal 50 aia tam khung tling ziah thei forward hi club level-ah ropui viau mah se ram tan a la ropui tawk loh avangin amah hawtute tan Portugal tana a che ṭha thei lo hi sawiselna tham a ni.

Iceland an te lo

Mipui 330,000 (nuai thum leh sing thum) lek chenna ram nichungin Iceland-in Euro 2016 an khel a, European Championship-a inlan thei ram zingah an te ber. A ram zau zawng leh mipui aṭangin Iceland te mah se khelmual chhungah erawh an te ber lo!

Euro 2016 khel tura an zinkawngah Netherlands chu vawi hnih lai an hneh thei. Portugal an hmachhawnna inkhelah players dang zawng aiin Iceland keeper Halldorsson-a'n first half-ah ball a khawih hnem ber a, vawi 30 a khawih!

Inkhelh chhun zawngin Iceland-in ball 27.7% chiah an chang - mah se heti chung hian Portugal hmaa hlauhawm loh tawp an ni bik lo. Hun tawp dawna Alfred Finnbogason ball pet dang turin Portugal keeper Rui Patricio che ṭha hlauh lo se Iceland hi chak thei an ni.

Ronaldo a lawm lo

Chak tura beisei Portugal-in hnehna an chang zo lo a, team innghahna Ronaldo a lungawi thei lo - an hneh zawh loh Iceland team chu na takin a kap.

Portugal captain chuan, "Iceland kha inkhel tawpa an hlim leh lawm dan en chuan Euro champion ang mai an ni," tiin hmusit takin an hneh zawh loh team a sawisel.

Kum 31-a upa forward chuan sawi chhunzawmin, "Result hi a awihawm loh hial zawk a ni. Hnehna chang ngei turin theihtawp kan chhuah a, Iceland khan engmah an ti ve lo. Ka ngaihdan chuan Iceland rilru put hmang kha a te em em a, Euro-ah hian eng chin mah an thleng lo ang," tiin a ṭawngkam a duhtui lo hle.

Austria barakhaihtu Hungary

Group F inkhel dangah Hungary chuan 2-0 in Austria an hneh a, beisei loh result a ni. Austria hian inkhel ṭan aṭanga second 28-na lekah David Alaba hmangin chance nei nghal mah se Bayern Munich defender ball pet hian post a per a, Hungary an vannei takzet.

Goal lut loa chawlhlawk hman a nih hnuah minute 62-naah Hungary-in Adam Szalai hmangin goal hmahruai an khung a, Austria an insiamṭhat hmain minute li hnuah Aleksandar Dragovic chu a yellow card pahnihna a chawi avangin hnawhchhuah a ni.

Players tam zawka khel Hungary-in inkhel an thunun chhunzawm a, minute 87-naah Zoltan Stieber chuan goalkeeper chauh a hmachhawn hnuah mawi takin a chhuih lut a, Austria keeper Robert Almer tan tih theih a awm lo.

Hungary keeper Gabor Kiraly chuan kum 40-a upa nichungin ram tan a khel a, Euro-a inlan thei player upa ber niin Zlatko Junuzovic-a goal shot ṭha taka a dan dan enin a la tar tawk lo tih a lang.