London Anniversary Games-ah Bolt inlan dawn

Olympic champion Usain Bolt chuan July 22 a tlan tur London Anniversary Games 200m intlansiakah a inlan tur thu a ti chiang ta.

Jamaican sprinter hi 200m world record (19.19) chelh mektu a ni a, London Grand Prix bikah hian kum 2008 khan record (19.76) a lo siam tawh bawk a, kuminah pawh hian hnehna chang tura beisei a ni.

London GP-ah hian nikum World Championship 200m intlansiaka pangana Zharnel Hughes bakah Britain tlanchak hmingthang Nethaneel Mit-chell-Blake pawh inlan tura beisei a ni bawk.

Golden League-ah hian Bolt hi kum 2005 khan kum 17 chauha upa ni chungin a vawi khat nan a inlan a, hemi hnu hian vawi sarih a inlan zui leh tawh. 100m intlansiak bikah hian vawi hnih inlan tawhin kum 2013 (9.85) leh 2015 (9.87) khan hnehna a lo chang ve ve tawh.

Kum 29-a upa Bolt chuan, "London Anniversary Games hi kumin Olympic hmaa 200m ka intlansiakna hnuhnung ber a ni tawh ang a, hei hi Rio atana inbuatsaihna ṭha tak a nih ngei ka beisei," tiin a sawi.