Copa America Centenario A thlengtu US hmaah Ecuador an ding dawn
Zirtawpni zing dar 7 hian Copa America Centenario quarterfinal match hmasa ber khelh a ni dawn a, inelna thlengtu United States leh Ecuador an inhmachhawn ang.
Khawvela ram leh ramte football-a inelna upa ber Copa America hi kumin hi a kum 100-na a ni a, kum li dana neih ṭhin he inelna hi nikum khan Chile-ah neih tawh ni mah se kum bik a nih avangin a kum zawnin neih a ni. Ram 16 inlanin group paliah
ṭhen hran an ni a, an inkhelh kual vek hnuah a sang pahnih ṭheuhin quarterfinal an inhlangkai.
US hi group A-ah awmin an match hmasa berah Colombia chu 2-0 in an hneh lo nghal a, mah se Costa Rica (4-0) leh Paraguay (1-0) te hneh zui lehin group hmahruaitu ni chungin knock out stage hi an inhlangkai.
Hetihlai hian group B runner-up Ecuador hian league round-ah Brazil leh Peru te an inhnehtawk pui hnuah an match hnuhnung berah Enner Valencia, Jaime Ayovi, Christian Noboa leh Antonio Valencia te goal khat
ṭheuh khung hmangin Haiti 4-0 in an sawp a, point nga hmuin Peru hnuai chiahah an awm.
United States innghahna tur chu striker Clint Dempsey a ni leh dawn a, Premier League club Fulham leh Tottenham tan pawha lo khel tawh Dempsey hian group stage-ah khan Costa Rica leh Paraguay lakah goal a khung ve ve a, ram tan goal 51 khung tawhin US tana goal khung hnem ber Landon Donovan chu goal ruk chiahin a phak lo tawh.
US coach Jurgen Klinsmann chuan, "Clint hi chu player danglam bik a ni a, inkhel zawng zawngah inlan veka a tawp thleng khelh a duh ṭhin. Goal khung thiam bik a nih avangin kan team tan a ṭangkai em em a, Copa America chauh ni loin kum 2018 Russia World Cup thleng pawha goal khung a chhunzawm zel pawh ka beisei," tiin a sawi.
Fulham tana goal 50 khung tawhtu Dempsy hi Europe lama a inkhelh hnuah MLS lamah a kir leh tawh a, goal khung a la bansan chuang lo. 2014 Brazil World Cup-ah khan goal hnih khungin American player zingah World Cup vawi thuma goal khung thei hmasa ber a ni a, nikum khan ram tan match 10 a khelh aṭangin goal kua a khung bawk.
Inlan tura beisei te:
United States (4-4-2): Guzan; Besler, Cameron, Brooks, Johnson; Zardes, Bradley, Jones, Bedoya; Dempsey, Wood
Ecuador (4-2-2-2): Dominguez; Paredes, Mina, Erazo, Ayovi; Noboa, Gruezo; A. Valencia, Montero; E. Valencia, Ayovi