Euro 2016 Zanin hi world champion inlan leh hun Germany Vs Poland; Ukraine Vs Northern Ireland
2014 FIFA World Cup champion Germany-in zanin dar 12:30 hian Stade de France-ah an ram ṭhenawm Poland an hmachhawn dawn a, Euro 2016 qualifier-a group khata awm ram pahnihte hi an match hmasa bera an chak avangin zanin inkhel a hmuhnawm sawt ang. Group C inkhel dangah Ukraine leh Northern Ireland te zanin dar 9:30 hian Parc Olympique Lyonnais-ah an inhmachhawn bawk dawn.
Rinkai zawk Germany
Euro 2016 qualifier-a top scorer Robert Lewandowski chuan, "Ka ngaihdan chuan Germany hi champion tura rinkai an ni. Tun dinhmuna Germany ṭhat zia kan hria a, amaherawhchu eng nge thleng dawn a hriat lawk loh. Rilru fim taka kan awm a ṭul a, kan inrintawk a ṭul bawk. Northern Ireland kan khelh ṭum ang thoin hlauh kan nei thiang lo a, kan mangang thiang lo - nuam ti taka kan khelh a ṭul a ni," tiin Germany chu rinkai zawk an nih thu a sawi.
Poland captain Lewandow-ski hian Borussia Dortmund tan kum thum a khelh hnuah Bayern Munich tan kum hnih a khel leh tawh a, club pahnih tana a goal khung zat belhkhawm hi goal 170 a ni. Bayern striker Lewandowski chuan, "German player-te ka hriatchian ang bawkin anni pawhin min hrechiang tih ka hria. Germany hi chu player ṭha rual awm khawmna a ni a, position tin hi player ṭha vekin an rem thei a ni," tiin a khingpui turte a fak.
Poland hian an match hmasa berah Arkadiusz Milik-a goal hmangin Northern Ireland chu 1-0 in an hneh a, Germany-in Shkodran Mustafi leh Bastian Schweinsteiger te goal hmangin Ukraine 2-0 in an hneh thung. Polish keeper Wojciech Szczesny chu match hmasa bera a inhliam avangin Germany a hmachhawn thei dawn em tih a chiang lo.
Ven ngai Milik!
Poland match hmasa berah an chhuanvawr Lewandowski a cheṭha tawk lo a, amaherawhchu Adam Nawalka hoten player pakhatah an innghat lo tih lantirin Ajax striker Milik a rawn inlar. Euro 2016 hmangin Polish striker hian hming a chher chho ṭan a, kum 22-a upa striker hian qualifier-a Germany an hneh ṭumin goal a khung tawh bawk.
Mak ang reng tak chu feet ruk leh inches 2.5 a sang Milik hi kum ruk liam ta khan Tottenham Hotspurs-ah trial a neih hnuah £100,000 in an la lut thei a, Spurs-in an la lut duh lo. Tunah erawh Spurs tan Polish striker la lut tur chuan sum tam tham tak hman a ngai tawh ang, a chhan chu Milik hian a club khelh mekna Ajax-ah season liam ta khan match 42 inlanin goal 24 a khung bakah assists vawi 12 zet a nei bawk. Northern Ireland lama goal khungtu hi Germany tlarhnung lamin an venṭhat a ṭul dawn a ni.
World champion lam
Germany captain Bastian Schweinsteiger chu starting eleven chang turin a khel tlak lo a, Manchester United midfielder hian match hmasa berah erawh hun tawp dawnah lutin goal a khung lawi si. German player ropui Franz Beckenbauer chuan, "Team an ṭhat lutuk avangin Basti-a tan starting eleven channa chhan tur a awm lo a, amaherawhchu substitute aṭangin hun tam zawk a khel ang," tiin captain chungchang a sawi.
Schweinsteiger a khelh phak loh avangin khelmual chhunga Germany captain chu Manuel Neuer a ni a, Bayern Munich keeper hian match hmasa berah a theihna pholang mah se tlarhnung erawh insiam-
ṭhat an mamawh hle. Midfield lamah erawh Toni Kroos a khel-
ṭha a, Real Madrid midfielder leh Sami Khedira inkawp hi Mesut Ozil-a'n a thlawp bawk avangin anni aia ṭha chuang an awm lo.
Ukraine an khelh ṭumin Thomas Muller a hriam tawk lo a, hmatawng bera awm Mario Gotze a danglam bik lo. Hei vang hian zanin hian Poland-a piang Lukas Podolski chu bench aṭanga chance an pe a nih pawhin a mak lo ang. Arsenal forward hlui hian season liam ta khan Galatasaray tan match 50 a khel a, tun hi inelna hi Germany tan inelna lian thama vawi sarih a telna a ni bawk.
Germany an chungnung
Poland leh Germany te hi qualifier-ah vawi khat ve ve an chak a, tun dinhmunah chuan an intluk tawk tih a chiang. Amaherawhchu an intum tawhna zawng zawng thlir erawh chuan Germany chu team chungnung zawk chu an ni. Ram pahnih hi vawi 20 an inhmachhawn tawhah Germany hi vawi 13 zet an chak a, vawi ruk inhnehtawkin Poland hi vawi khat chiah an chak.
Zaninah erawh tun hma lama record chu dah ṭhat a ni ang a, chak zawk ni turin minute 90 chhunga goal khung tam zawk nih a pawimawh ang.