NBA Finals Game 6 Cleveland an ṭang tlang thei ang em?

Zirtawpni zing dar 6:30 hian Quicken Loans Arena, Cleveland-ah 2016 NBA Finals Game 6 khelh a ni dawn a, Cleveland Cavaliers hian Golden State Warriors-in nomawi an chawi lai an en dawn nge an la chelh rih dawn tih chu khawvel basketball ngaina tute hmuh chak a ni.

Champion lai Golden State tan an nomawi humhim turin vawi khat chak bak a ngai tawh lo a, Cleveland tan erawh chet sual a thiang tawh miah lo thung. GSW hian 3-1 in hma hruai fal hman tawh mah se Thawhṭanni zing khan Oracle Arena-ah LeBron James leh Kyrie Irving an ngam lo a, Cavs-in hnehna changin tuna an dinhmun chu 3-2 a ni mek.

Game 5 inkhelah khan Warriors hian hrem vangin Draymond Green an chhawr thei lo a, American power forward hi Game 6-ah a inlan a nih chuan inkhel ti danglam vek theitu a nih zia kan hmu nawn fo tawh. Golden State Big Three tia an sawi ṭhin MVP Stephen Curry, shooting guard Klay Thompson leh Green te hi season li chhung an khel ho tawh a, an khelh fuh ni chuan dan ngaihna awm lo khawpa thiam an ni.

Hetihlai hian Cleve-land thiampuipa James hi NBA Most Valuable Player atana ṭum li thlan tawh a ni a, NBA Finals hi a zawna ṭum ruk a khelhna niin match 26 teh meuh a khel zawn tawh a, amah chauh pawh hi thlamuan pui tham leh innghahna tling a ni hial.

Cleveland khelmual Quicken Loans Arena hi mikhual tana khelh harsatna hmun a ni a, regular season-ah match 38 hnehna changin vawi riat chiah an chak lo a, an chesual ngai mang lo tihna a ni. Kumin Finals-ah pawh hian Warriors hi 120-90 in an lo hneh tawh a, mahse Golden State pawh hian 108-97 a hnehna an lo va chan let ve tawh bawk vangin inkhel result tur rinthiam a harsa hle.

Golden State coach Steve Kerr chuan, "Tun hnaiah inkhel boruak sang tak tak kan hmachhawn zawn malh malh hle a, player-te pawh an chauin an rilru leh taksa a hah hle. Mahse hrehawm tam tak kan lo tawrh tlang tawh kha a thlawna luan ral tir mai kan tum lo a, tun hi kan theihna tak tak lanchhuah tirna hun chu a ni," tiin a sawi.

Power forward James chuan, "Kan khemuala inkhel tur kan ni a, khaw-vela fans ṭha berte nen mikhual kan lo dawn sawn dawn avangin zamna chhan tur a awm lo. Kan khingpui turte lo ngaihtuah vak ai chuan kemahni lam hi a ṭha thei ang bera khel chhuak tura kan inbuatsaih a ṭul," tiin a sawi.