Copa America Centenario Argentina hnungzuiin Chile an tlang

Nilaini zing khan Copa Ameri-ca Centenario league round khelh zawh a ni a, quarterfinal lut chiang tawh Argentina chuan Bolivia 3-0 in an sawp a; inkhel dangah Chile chuan Panama lakah 4-2 a hnehna changin knockout round an inhlangkai ve bawk.

Argentina hian an match hmasa pahnihah hnehna an chan tawh avangin quarterfinal an lut chiang tawh a, coach Gerardo Martino chuan hliam dam hlim Lionel Messi chu la dimin bench-ah a ṭhut tir. Panama laka goal khat khungtu Manchester City striker Sergio Aguero leh Napoli hmatawng Gonzalo Higuain ten inkhel bul an ṭan.

CenturyLink Field, Seattle-a inkhelah ṭan aṭanga tawp thlengin Argentina an chungnung tluan chhuak zak a, Erik Lamela (13), Ezequiel Lavezzi (15) leh Victor Cuesta (52) te chuan first half-ah goal khat ṭheuh khungin minute 45 an khelh chuan chak tur a chiang vek tawh.

Second half-ah Panama laka goal thum khungtu Messi chu khelmual chhungah luh tir a ni a, Serie A top scorer Higuain thlaktu Messi hoin Argentina hian inkhel thunun chhunzawm mah se goal dang an khung belh tawh lo. Kum 23 chhung zet major tournament-a champion tawh lo Argentina hian match thum an khelh aṭanga point kua hmuin Group D-ah hmahruaitu an ni a, quarterfinal-ah Venezuela an hmachhawn ang.

Argentina coach Gerardo Mar-tino chuan, "Minute 45 chhung ṭha taka kan khelh avang-in a dang kha chu hahdam zawkin kan khelh theih phah. Ka naute hliam nei an dam tawh a, kan boruak a ṭha hle. Match thum chhung ṭha takin khel thei mah ila tuna pawimawh zawk chu knockout stage a ni a, a tawp thlen ngei kan tum," tiin a sawi. Kum 53-upa Martino hian hnungzâng na vanga an match hmasa bera an chhawr loh Messi chuan hma a sawn thu leh an inkhelh lehpekah pawh a inkhelh ngei tur thu a sawi tel bawk.

A tawpah Chile

Champion lai Chile hi an match hnuhnung berah hian chak lo chu ni se Brazil leh Uruguay te hnungzuiin an puanthuah tel thei dinhmunah an ding a, a tawpah erawh an him hram.

Nimin zing khan Lincoln Financial Field, Philadelphia-ah Group D aṭanga quarterfinal luh beiseina la nei pahnih Chile leh Panama an inhmachhawn a, a tira lawm zawk chu Panama ni mah se a tawpa hlim zawk erawh Chile an ni thung.

Panama midfielder Miguel Camargo-a'n inkhel ṭan aṭanga minute ngana lekah goal hmahruai khungin an ram beiseina a siam. Mahse, Chile-in champion zia chhuahin Hoffenheim forward Eduardo Vargas (15', 43') goal hnih hmangin an chhang let a, second half ṭan tirhah Alexis Sanchez chuan an goal thumna a khung leh bawk.

Forward Abdiel Arroyo chuan minute 75-ah goal khat tauh lutin Panama beiseina chhem nung thar ve leh mah se Arsenal forward San-chez-a'n hun tawp dawnah goal khung lehin Chile an chak a, quarter final-ah Group C hmahruaitu Mexico an hmachhawn leh ang.

Chile goal hmasa pahnih khungtu kum 26-a upa Vargas chuan, "South America champion lai kan ni a, nikuma kan khelh dan leh kumina kan khelh dan hi chu a inthlau rih tih chu hriat vek a ni. Hnehna kan chang hi kan vanneih vang a ni pakhat a, hei hian inrintawkna min siam sak ngei ang," tiin duhthusama an la khelh ṭhat tawk loh thu a pha lo.