Sharapova-i'n hremna a khing let

Maria Sharapova chuan kum hnih chhung tennis khel thei lo tura an hremna chu khawvela infiamna kawng hrang hranga thubuai ngaihtuahtu sang ber Court of Arbitration for Sport (CAS) hnenah a khing let.

Russian star Sharapova hi kumin Australian Open-ah khan infiammite tana hman phal loh damdawi meldonium a hmang tih hriat chhuah a ni a, kar hmasa khan tennis thuneitu sang International Tennis Federation (ITF) chuan kum hnih chhung inkhel thei lo turin hremna a lo ti chhuak tawh.

Grand Slam vawi nga champion tawh Sharapova hian an hremna hi hnuk kir tur emaw ti nep turin CAS hnenah hian a thlen a, Sharapova dan hremi chuan he damdawi hi duh reng vanga hmang a nih loh thu leh dan bawhchhiatna a ni tih a hriat loh vang niin a sawi bawk.

Kum 29-a upa Sharapova hian a taksa hrilsena vawn ṭhat nan meldonium hi kum 2006 aṭang khan a lo hmang tawh a, tun hma zawng chuan infiammita tana hman khap zingah a tel ngai lo. Kumin January 1 aṭang khan World Anti-Doping Agency (WADA) chuan hman phal loh zingah hian an telh ve chauh a ni.

Russian player zinga Wimbledon champion hmasa ber Sharapova hi hmeichhe infiamna khawvelah chuan hming langsar berte zinga mi a ni a, Australian Open (2008), US Open (2006) leh French Open (2012, 2014)-ah te a champion tawh.