Olympic Medal an tlangzarh

June 14, Thawhlehni khan Rio 2016 Olympic medal design chu tlangzarh a ni. Medal hi 2,488 (812 gold, 812 silver & 864 bronze) zet a awm a, pakhat hi 500 gram zela rit a ni. Medal design-ah hian laurel hnah hman a ni a, he hnah hi hmanlai Greek hunah chuan hnehna entirna a ni. Laurel hnah hian Rio 2016 logo chu a hual. Medal hnung lamah Nike (Greek hmasâng thawnthua hneha pathian), Panathinaiko Stadium leh Acropoli lem a chuang bawk. Panathinaiko Stadium hi hmanlai Greek stadium a ni a, tun hnuah chei ṭha lehin tun lai huna Olympics Games (1896) an neihna hmasak ber a ni. Acropoli hi Athens khawpui chunga awm kulh a ni.