Thunder an la tlawm lo; Game 7 an khel dawn

Oklahoma City Thunder chu Houston Rockets lakah an tlawm mai duh bik lo, game 6 inkelah Thunder hian 104-100 a hnehna changin series-ah 1-1 in an inhnehtawk chiah. Tukin hian game 7 an khel zui a, a chak zawkin conference semifinal-ah Los Angeles Lakers an hmachhawn ang.

Houston hian series-ah 3-2 in hma an hruai hman a, game 6 an khelh lai hian minute li chauh khelh hmabak a awm tawh tihah 98-92 in hma an hruai, harsa lutuk loin an tlang mai dawn niin a lang hman.

Mahse Thunder tan Chris Paul-a'n a zawnin 3-points neiin an nih rual chiah a, team pahnih intluk tawk chho zelin second 15 chauh a awm tawhah Paul-a bawkin free throw vawm lutin a team a chakpui.

Eastern Conference lamah chuan team ṭhenkhatin semifinal an khel tawh. Chak tura rinkai zawk Milwaukee Bucks chuan Miami Heat lakah game 1 chu 115-104 in an hloh. Inrinni zing dar 4:00-ah game 2 an khel leh ang, tlang tur chuan a tlem berah game li an lak a ngai.

Heat tan hian Jimmy Butler a che ṭha hle, court chhungah minute 36 hun a hman chhungin point 40 zet a hlawh chhuak hman, a point neih zinga 14 ngawt hi quarter hnuhnung bera a neih a nih bawk avangin an chak theih nana player pimawh ber tiin a sawi ngam.

Most Valuable Player nilai Giannis Antetokounmpo awmna Bucks lamah che ṭha fal an awm lo - Greek player hian point 18 chauh a nei a, nidang a phak lo. Khris Middleton (28 points) leh Brook Lopez (24) te che ṭha thawkhat mah se an team chakpui nan a tawk zo lo.