Coco Gauff a tla nghal

American tleirawl tennis khel thiam Coco Gauff chu US Open-a a match hmasa berah a chak lo nghal. Nimin zing khan Gauff hi Anastasija Sevastova lakah 6-3, 5-7, 6-4 in a chak lo a ni.

Kum 16 mi Gauff hian season hmasa khan khawvel a barakhaih tawh a, kuminah pawh a lakah beiseina a sang. Mahse an mahni ramah ngei beisei a phak ta lo, seeded 31-na Sevastova lakah set khatna a hloh hnuin set la let ve mah se a ding tlang zo ta chuang lo.

World number 51 Gauff chuan, "Entu awm loa inkhelh chu a boruak a danglam hle, tun ṭum aia ṭha zawk khan ka khel thei tih chu ka hria. Tuna ka mamawh leh thil tum ber chu a tam thei ang ber tournament khelh a ni.

"French Open khel turin rilru ka pe leh nghal ang, inelna lian boruak tawn hnem pawh ka tan a pawimawh," a ti. Gauff hi junior lamah chuan world number 1 dinhmun a luah tawh, a kum rualpui ten senior level an khelh hmain a theihna san vangin a inlan phak.

Inkhel dangah Naomi Osaka chuan amah ang bawka Japanese player Misaki Doi chu 6-2, 5-7, 6-2 a hnehin second round a inhlangkai. Grand Slam vawi hnih champion tawh hi Western and Southern Open-ah final khel thei loin a inhnukdawk a, tunah erawh a hliam a dam tawh.

US Open-ah hian hmeichhe ranking sang zual 10 zinga paruk an inhnukdawk a, champion tur rin thiam a harsa. Seeded pakhatna Karolina Pliskova leh parukna Petra Kvitova te pawhin an match hmasa berah hnehna an chang ve bawk.

A vawi khat nana Grand Slam champion nih beisei Pliskova a inringtawk hle, a khingpui Anhelina Kalinina lakah zahngiahna lantir loin 6-4, 6-0 in a hneh. Inkhel dangah Kvitova pawhin winners vawi 23 vaw chhuak chungin Irina-Camelia Begu 6-3, 6-2 in a hneh.

Wimbledon champion hlui Angelique Kerber pawhin January thla hnua a match hmasa ber a khel ve leh chauh. German player hian Australian nula Ajla Tomljanovic chu 6-4, 6-4 a hnehin second round a inhlangkai ve bawk a ni.