Roma-ah a nghetin Mkhitaryan a lut

Arsenal midfielder  Henrikh Mkhitaryan chuan Premier League club nen inhriatthiam tawnnain a contract a titawp a, AS Roma chu a ngheta khel turin a zawm. 

Kum 31 mi attacking midfielder hi Roma-a a contract rei zawng tarlan a ni lo a, Gunners-ah hian kum khat contract la nei mah se English club hian a thlawna chhuahtir an remti a ni. 

Mkhitaryan chuan, "AS Roma chu a nghetin ka zawm ta tih hlim takin ka puang a ni. Arsenal-a thawkte leh fans maktaduai chuang chungah min thlawpna avang khan lawmthu ka sawi. Ka chunga rinna nghat a, Arsenal-a min laluttu Arsene Wenger chungah ka lawm lehzual a ni," tiin social media lamah Arsenal a chhuahsan thu a puang. 

Arsenal-in a thlawna Mkhitaryan an chhuahtir anga a lan lai hian pound maktaduai 12-13 inkar vel an dawng ang thoa chhut a ni - kum khata a hlawh pound maktaduai 8.5 pek a ngai lo phawt.

Hei bakah hian a contract-ah hian a contract-a hman zawha a dawn tur 'loyalty bonus' (pound maktaduai 2.5)-a tel a, contract a tihtawp avang hian Mkhitaryan zawk hian Arsenal hnenah pound maktaduai khat a pek a ngai bawk. 

Heng zawng zawng chhut hian Arsenal hian a thlawna chhuahtir angin lang mah se sum sen tur tam tak an hum a, Gunners tan chuan chhawr duh tawh loh player kaltir nana thutlukna finthlak tak a ni. 

Mkhitaryan hian January 2018 khan Manchester United aṭangin Alexis Sanchez nena inthlengin Arsenal a zawm a, mahse London club-ah beisei a phak lo. 

Roma-ah hian season hmasa kha loan-a kaltir niin a thiamna hloh tawh a chhar let niin a lang a, inelna hrang hrangah match 30 khela goal kua khungin assist vawi ruk a nei a ni. 

Serie A club hian season hmasaa loan hmanga an hawh zingah Carles Perez, Gianluca Mancini leh Jordan Veretout-te chu a nghetin contract an ziahpui tawh a, Chelsea-a a contract hmang zotu Pedro chu a thlawnin an lalut tawh bawk.