PSG player pahnihin hri an kai

Thawhṭanni khan Paris Saint-Germain player ten Covid-19 an kai em tih endik a ni a, an zinga pahnih chuan hri an kai tih hmuh chhuah a ni. Hri kaite hi an hming tarlan a ni lo a, sorkar inkaihhruaina angin khung hran nghal an ni.

PSG player pahnih hming hi chiang taka tarlan ni lo mah se French media-te chuan Angel Di Maria leh Leandro Paredes te ni ngeia an hriat thu an sawi a, anni pahnih hian chawlh pawh an hmang rei lo.

Di Maria leh Paredes te hian September 10-a Racing Lens nen Ligue 1 season thar an khelh ṭanna tur match-ah an inlan ve dawn lo a, ni thum hnua Marseille an mikhual hunah pawh an la inlan thei lo ang.

Paris club hian Champions League final an khel a, Ligue 1 club dangte aiin season thar an ṭan har bik. An league match hmasa pahnih khelh hun chu sawnsak niin, international match a awm zui avangin an inlan har zual a ni.