Euro 2016 Turkey hmaah champion lai Spain fiahna
Zanin dar 12:30 hian European Championship-a champion lai Spain an inlan dawn a, an khingpui tur Turkey hian La Liga-a tawnhriat nei player an kawl nual avangin an en tlak khawp ang. Group D inkhel dangah Czech Republic leh Croatia te zanin dar 9:30-ah an inlan bawk ang.
A ngaiin
Spain boss Vicente Del Bosque-a'n Czech Republic an hneh ṭuma a player hmante bawk a chhawr dawn a nih chuan David de Gea, Jordi Alba, Gerard Pique, Sergio Ramos, Juanfran, Sergio Busquets, Andres Iniesta, Cesc Fabregas, David Silva, Alvaro Morata leh Nolito te bawk chu kan hmuh leh tur an ni.
Czech an hneh ṭumin Spain-in inkhel an thunun a, an ball pass zat vawi 694 zet niin chung zinga 632 chu an pass dik. Statistics thlirin Spain chungnung mah se goal khungah erawh harsatna an nei. Champion lai Spain hian an match hmasa berah minute 87-naah goal an khung chauh a, goal khungtu pawh striker ni loin defender Pique a ni.
Zanin hian David Silva, Alvaro Morata, Nolito leh Aritz Aduriz te innghahna tlak nih an tum dawn. Manchester City midfielder Silva hian ram tan vawi 100 a khel tling tawh a, ram tana player dang pathum Morata, Nolito leh Aduriz te goal khung zat belhkhawm hi goal riat chauh a ni.
Ven ngai Arda
Turkey-in an match hmasa bera Croatia an hneh loh ṭumin Arda Turan a cheṭha tawk lo a, chutichung chuan a ṭhat zia hretu club tana a khelhpui Jordi Alba chuan ven a ngaih thu a sawi thung.
Spain-in wing back Alba leh Juanfran an kawl a, Barca defender hian Arda hi season khat khelh pui tawhin Atletico Madrid defender Juanfran-a nen season li an khel dun thung. Turkey captain Turan chuan, "Ka ṭhiante vek an ni a, chu chu football hlutna a ni. Spain hi chak tura rinkai zawk an ni a, ball pawh an chang tam zawk ang mah se player 11 leh 11 inkhel tur kan nih avangin a tawp thlengin kan ṭang dawn," tiin champion lai a hlau bik lo.
Turkey hian Spain hi 1954 World Cup qualifying-ah 1-0 in an hneh a, hemi hnu hian an hneh leh tawh lo. La Furia Roja hian Turkey vawi 10 hmachhawn tawhin vawi nga an hneh a, vawi li an inhnehtawk.
An sawi Emre Mor
Turkey-in Croatia an hneh loh ṭumin darkar chanve tling lo hret Emre Mor a rawn inlan. Kum 18 leka upa Mor hi season liam ta khan Danish club Nordsjaelland tan khelin season tharah erawh Bundesliga club Borussia Dortmund tan a khel tawh ang.
Turkish winger hi feet nga leh inches ruk leka sang ni mah se a tlan chak bakah ball khalh a thiam a, tuna a ṭhatna ai mahin a hmabak a eng avangin sawi a hlawh.
Croatia hmaah Cech
Czech Republic-in Spain an dan zawh ṭep hnuah Croatia an hmachhawn leh dawn a, Arsenal keeper Petr Cech chu keeper pahniha rim tur zawka ngaih a ni. Luka Modric leh Ivan Rakitic te kaihhruaina hnuaiah Croatia-in game mawi an khel a, Ivan Perisic leh captain Darijo Srna te chu player hmuhnawm an ni.
Wing back ball thiam Srna hi match hmasa berah inhliam mah se Czech hmachhawn tur hian a dam ṭhat hman beisei a ni. Ram pahnih friendly match-ah bak an la inhmachhawn lo a, ṭum hnih an inkhelh tawhah Croatia vawi khat chakin vawi khat dang erawh an inhnehtawk.
Czech Republic captain Tomas Rosicky chuan, "Player naupang zawk fuih hi kan hna a ni a, chutihrualin thil tam hrilh theih loh a awm. A ṭhen hi chu footballer an nih anga an hmachhawn ve phawt a ngai a ni. Inelna ṭan hmain player ṭha Iniesta ang chi hi an la hmachhawn ngai lo a, TV-ah chauh an hmu ṭhin. TV-a en leh a taka khelhpui a dang a ni. Kan player-te an inringtawk chho ang a, team ṭha zawka ngaih hi kan barakhaih theih ang," tiin result ṭha a beisei thu a sawi.