ATK leh Diego Forlan an inhnimhnai

Indian Super League club Atletico de Kolkata chuan Manchester United leh Villareal striker hlui Diego Forlan chu kuminah an club tana khel turin an dawr mek a, Uruguay striker ropui leh Kolkata club hi an inhnimhnai tawh hle nia sawi a ni.

Kum 37-a upa striker hian kum 2015 khan a career bul ṭanna Penarol a pan a, Uruguay club-ah hian contract hmang zo tawhin cham chhunzawm zel tura sawm ni mah se contract thar a ziak duh lo.

Atletico Madrid tan pawha lo khel tawh striker chuan, "Level sang taka khel turin theihna ka la neiin ka hria a, goal tam tak khung thei dinhmunah ka la ding mek a ni. Europe leh Asia aṭangin sawmna tam tak ka hmu a, khawilam nge ka pan dawn tih ka ngaihtuah mek a ni," tiin a hmalam hun a la chian loh thu a sawi.

Kolkata club thuneitu zinga mi chuan, "Tuna kan tana pawimawh ber chu striker in fit tak neih a ni a, Forlan chungchangah engmah sawi theih ka nei rih lo. Ka sawi theih awmchhun chu striker in fit ṭha kan zawng tih hi a ni," a ti.

Atletico de Kolkata hian season hmasa khan Portuguese striker Helder Postiga an la lut a, Porto striker hlui hian hliam vanga match a khelh tam theih loh avangin tuna an fimkhur viau pawh hi a awm hle.

Uruguay tan match 112 a inlana goal 36 khungtu Forlan hian United-ah hlawhtlinna chhar tam tawk lo mah se La Liga lam a pan hnuah season hnih chhung league top scorer a ni a, European Golden Shoe vawi hnih dawngin 2010 World Cup-ah khan Golden Ball a dawng.