France-in last 16 an thleng A hun teah Griezmann leh Payet an rah

Stade Velodrome, Marseille-ah Albania-in hrem vanga captain Lorik Cana an chhawr thei lo chungin France lakah an ṭang khawng ve tlat a, Didier Deschamps leh a naute mangang hman mah se an talbuai lo. Minute 90-naah substitute Antoine Griezmann-a'n Les Bleus tan goal pawimawh a khung a, minute ruk hnuah Dimitri Payet-a'n chak nemnghehna goal a khung.

Inelna thlengtu France 2-0 in an chak a, UEFA Euro 2016-a knockout stage thleng hmasa ber an ni. Albania erawh an vawi hnih khelh tawh aṭangin point an hlawh chhuak lo a, last 16 lut tur zinga an tel aiin a tla tur pariat zinga an tel a rinawm tawh zawk.

Inenchhinna?

France-in an match hmasa berah Romania 2-1 in an hneh hram a, tlarhnung a phui tawk lo. Amaherawhchu Didier Deschamps-a'n Albania hmachhawn turin tlarhnung lamah tih danglam a nei lo. Defence thlawp tur pawhin midfield-ah N'Golo Kante leh Blaise Matuidi te bawk an awm a, tlarhmaa mal tlat pawh Gunners striker Olivier Giroud tho a ni.

Inelna ṭan hmaa France innghahna tura an sawi Paul Pogba leh Griezmann te aiah rawlthar duhawm Kingsley Coman leh Anthony Martial te chu fiahna hmachhawn turin inkhel bul ṭantir an ni a, Payet chu midfielder zinga khaipa a ni.

Gianni De Biasi-a'n ram tana vawi 91 khel tawh leh Marseille player hlui Cana a chhawr theih tak loah chuan 4-5-1 formation hmangin point hlawhchhuah hrim hrim an tum thung.

Mipui an ngawi

France-in an match hmasa berah Romania an hneh a, an khingpui Albania-in Switzerland lakah point an hlawh chhuak lo. Les Bleus hian inkhel thununin ball chu an chang tam ngei a, amaherawhchu first half-ah goal zawnah vawi khatmah an pet lo - mikhual team pawh an dang-lam bik lo.

Manchester United-in man to taka an lakluh Martial-a'n France tan club tana a khelh dan a phak lo a ni ber a, kum 20-a upa forward hi first half bak khelhna hun pek ni loin second half ṭantirhah Paul Pogba a rawn inlan thung.

A tawpah France

Albania-in inkhel bul an ṭan ṭha zawk a, Armando Sadiku cross in Bacary Sagna a per hnuah France goal ban vei lam a per a, hei hi inelna thlengtu beng harhtuah a ngaih theih.

Juventus midfielder Pogba awm takah chuan Payet chu mual vei lamah a tawlh phei a, Hammers midfielder chevel a hmuhnawm a, a ke dinglam a hman dan aṭang chuan Premier League club naran chung hreta awm reng tur niin a lang lo. Pogba-a'n a hun ṭha neih chu goal-ah a chantir thei lo a, Patrice Evra cross chu Giroud-a'n goal ban a tauh per bawk.

Hun tawpah erawh Deschamps-a substitution siamin awmzia a nei tih a rawn lang a, 4-2-3-1 aṭanga 4-3-3 a formation an thlak chu inkhel result thlaktu a ni. Adil Rami cross chu vengtu nei lo Griezmann-a'n keeper Etrit Berisha dan rual loin goal kilah tak a tauh lut. Goal khat hi France chak nan a tawk a, mah se an player enin Albania lamah chuan goal hnih tal khung tur an ni. Payet-a'n box chhung vei lam aṭanga ball la lutin a ke dinglamin a hlai lut a, Hammers midfielder hi a phu ang ngeiin man of the match-a thlan a ni.

Eng nge an sawi?

France coach Didier Deschamps chuan, "Albania khan an thinlung zawng zawngin an khel a, goal an venhim ṭhat bakah counter attack an hman thiam avangin khelh an har em em a ni. In draw ilang chuan Albania tan result ṭha a ni dawn a, amaherawhchu a tawp lama kan chetṭhat tak avangin result lawmawm tak kan hlawh chhuak a ni," tiin an khingpuite a fak.

France captain hlui Deschamps chuan, "Bench-a Pogba kan dah chhan chu khelh dan dang enchhin kan duh vang a ni a, Griezmann erawh ka thunun a ni. Eng pawh chu nise player pahnih hi bench aṭanga game thlak danglam thei an ni a, chu chu inkhelah pawh kan hmu a ni. Payet hi a tlo tulh tulh a, theihna leh inrintawkna a ngah avangin team tan a ṭangkai a ni," tiin a player-te a fak a, team khelh dan erawh a ṭhat tawk loh thu a sawi thung.

Albania coach Gianni De Biasi chuan, "Goal chance ṭha hlah chuan result ṭha a neih theih loh. France nen inbei tawkin khelṭha mah ila kan
ṭangtluan thei ta lo," tiin a sawi.

France-in point ruk hmuin Group A aṭangin last 16 an lut chiang tawh. June 19 zan hian group match hnuhnung berah Deschamps-a hoten Switzerland an hmachhawn ang a, Albania-in point khat chiah la hlawh chhuak Romania an hmachhawn bawk ang.