Copa America Centenario Colombia hmachhawn tur Peru

2014 FIFA World Cup top scorer James Rodriguez leh an ram Colombia chuan Copa America Centenario semifinal lut turin Peru an paltlang a ngai dawn a, Inrinni zing dar 5:30 hian MetLife Stadium, East Rutherford-ah chungnung zawk nih inchuhin an inkhel ang.

Copa America Centenario-ah hian quarterfinal leh semifinal-ah te extra time khelh a ni dawn lo a, minute 90 an inkhelh hnuah an inhnehtawk a nih chuan penalty shootout hmanga chak zawk zawn tur a ni. Hetiang a nih avang hian ram lian zawka ngaihte tan a chet sual theih a, team nem zawk deuh tan pawh beiseina a awma ngaih a ni. Final-ah erawh team pahnih an inhnehtawk a nih chuan extra time khelh a ni thung ang.

Colombia hi group A-ah awmin an match hmasa pahnihah United States (2-0) leh Paraguay (2-1) in an hneh nghal a, league round hnuhnung ber khelh hmain quarterfinal an lut chiang hman.

Costa Rica nen an inhmachhawn ṭumin coach Jose Pekerman-a'n a player ṭha James Rodriguez, Juan Cuadrado leh Edwin Cardona te chu bench-ah hahchawlh tirin Carlos Bacca, Jeison Murillo leh goalkeeper David Ospina te phei chu squad-ah telh lo hialin semifinal luh a tum tih a chiang hle.

Khawvela huap pawha player langsar tak tak kawl mah se Colombia hian tun hnaiah Copa America-ah sulhnu an nei ṭha hran lo. Kum 2004 hnulamah semifinal an la lut leh miah lo a, kuminah erawh final thlen an tum ngam thung.

Aston Villa winger Carlos Sanchez chuan, "Football-ah chuan tharum hian thil a ti thei hle a, mahse a chang chuan thluak hmanga inbeih a ngaih chang a awm ṭhin. Peru hmachhawn tur chuan kan taksa bakah kan rilru kan sen nasat a ngai dawn a, hnehna chang tur chuan kan theihna zawng zawng kan hman chhuah a ngai ang," tiin a sawi.

Peru lam hi...

Copa America biakah chuan Peru hi ram lian an ni. Kum 1997 hnulamah group satge an paltlang ziah a, tun hnai inelna hnuhnung pahnihah phei chuan semifinal an thleng a, kuminah hian Colombia aia rinkai lo zawk an ni bik hauh lo ang.

FIFA ranking-ah 48-na daih ni mah se Peru hi team huaisen an nih zia kan hmu tawh a, an group match hnuhnung berah striker Raul Ruidiaz goal khung sawi hlawh tak hmangin Gillette Stadium-ah Brazil 1-0 in an hneh.

World Cup champion vawi nga lo ni tawh Brazil chu kum 1987 hnua a vawi khat nan Copa America knock out round lut phak loa an siam bakah an coach Dunga an ban zui phah hial a, inrintawkna an neih san lai tak a ni.

Peru tana league match pathuma inlan kim vek Feyenoord midfielder Renato Tapia chuan, "Kan thawkho ṭhain kan inpumkhat tlat a, chu chu kan chakna chhan pakhat a ni. Hnehna chan hi chu engtik lai pawhin a nuam ṭhin a, Brazil kan hneh khan inrintawkna pawh min pek belh hle. Mahse, kan result neihsa tawhte kha kan ring thei lo a, tunah chuan Colombia chiah kan ngaihtuah a hun tawh rih," tiin a sawi.

Sulhnu

Ram pahnihte intawn tawhnaah Colombia an chungnung zawk hret a, vawi 22 hnehna chang tawhin Peru hi vawi 18 chak ve tawh thungin ṭum 21 an inhnehtawk tawh thung. Tun hnaiah bik Clombia hian result an nei ṭha hle a, kum 1983 hnu lamah vawi thum chiah an hneh lo.