Mumbai City-ah Argentina international

Indian Super League club Mumbai City chuan Argentina tan pawha lo inlan tawh midfielder Matias Defederico chu an la lut. Corinthians attacking midfielder hlui hian season hman zawh takah khan Chilean top division league club San Marcos de Arica tan a khel.

Argentina tana vawi hnih a inlana goal khat khungtu chuan, "Mumbai City FC tana khel tura contract ka ziak thei hi ka lawm takzet a ni. ISL hi ralkhat aṭangin ka lo hre ve tawh ṭhin a, chona thar hmachhawn turin ka inpeih tawh a ni," tiin kum 26-a upa midfielder chuan a sawi.

Mumbai City coach Alexandre Guimaraes chuan a player thar chung-chang hi sawiin, "Defederico hi ball thiam leh player talent nei ṭha tak a ni a, khawvela league ṭha ber bera khel kual tawh a nih avangin Mumbai City tan hlawkna nasa tak a nih ka beisei," a ti.

Costa Rican coach Alexandre Guimaraes hian an ram team chu 2002 leh 2006 World Cup-ah te a lo hruai thleng tawh a, a kaih-hruaina hnuaiah hian Haiti international Sony Norde chuan Mumbai City tana khelh chhunzawm turin contract thar a ziak bawk.