India rama cham zel turin Westwood a inpeih

Bengaluru FC chhuah-santu Ashley Westwood chuan India rama cham chhunzawm zel tura a inpeih thu a sawi. Kum 39-a upa manager hian May thla khan inhriat-thiam tawnnain Bengaluru a chhuahsan a, tunah hian club nei loin a awm mek.

English manager chuan, "Club nei loa ka awm mek avangin ka duh apiang dawr thei dinhmunah ka ding a, India rama cham zel hi ka pawi ti lo. Min dawrtu tam tak an awm tawh a, mah se kalphung leh ngaihdan ka neihte ka hman theihna tur hmun ka pan a ngai a ni," tiin tun maiah thutlukna a la siam theih loh thu a sawi.

Ashley Westwood hian Bengaluru FC-a kum thum a cham chhungin league nomawi pahnih a chawipui bakah Fede-ration Cup nomawi a chawipui a, tunah hian Singapore leh India team nen sawizawm an ni mek.