Arsenal tana khel turin Vardy a ṭha tawk - Robert Pires, Arsenal Legend

Arsenal player ropui ni ṭhin Robert Pires chuan Jamie Vardy chu Gunners tana khel turin a ṭhat tawk thu a sawi chhuak.

England international Vardy hian season hmasa khan Premier League-ah goal 24 khungin Leicester City a champion pui a, Euro 2016 khelh ṭan hma khan Emirates Stadium lam a pan fel dawna a lan laiin France-a a inkhelh zawhah a hmlam hun a ti chiang dawn ta zawk.

Arsene Wenger-a kaihhruaina hnuaia 'Invincibles' hun laia player pawimawh Pires chuan, "Season hmasa khan Vardy hian khawvel hriat khawpin a khel
ṭha a, a tum ruh leh thawhrim em avang hian Arsenal tana khel tur chi a ni. Goal khung a thiam em avangin North London club tana khel tur hian a tling tawk," tiin a sawi.

Premier League champion team-a vawi hnih tel tawh Pires chuan sawi chhunzawmin, "Club lian tana khelh chuan kan chungah mawhphurhna a sang duh hle a, mahse chumi hmachhawn tur chuan Vardy hi a huaisen tawk. Arsenal hian Granit Xhaka an lakluh tawh bawk avangin hmasawn an tum tih a chiang a, Swiss international hi innghahna tlak a ni ang," tiin a sawi bawk.