ISL club-ten thawm an nei zel

Indian Super League khelh hun a hnai a, club-ten transfer bazar-ah thawm an neih chhunzawm zel. Pune City chuan East Bengal aṭangin full back Rahul Bheke chu kumin chhung atan loan-in an la lut.

Pune City hian Air India, Mumbai FC, Mum-bai Tigers leh Kerala Blasters tana lo khel tawh defender bakah hian season hnih chhung Delhi Dynamos tana lo khel tawh midfielder Francis Fernandes chu lakluh tumin an dawr mek bawk.

Atletico de Kolkata manager hlui Antonio Habas enkawlna hnuaia khel tur Pune club hian Apoula Edel, Bruno Arias, Narayan Das, Sanju Pradhan, Vishal Kaith leh Arata Izumi te chu an lo la lut tawh bawk a ni.

Hetihlai hian Kerala Blasters chuan Mumbai FC goalkeeper Sandip Nandy leh Kunal Sawant bakah defender Pratik Chowdhury-te chu an club tana khel turin an la lut ve bawk a, Sachin Tendulkar-a club hian ISL season hmasa bera an player-manager England international hlui David James chu an dawr leh mek nia sawi a ni bawk.