Euro 2016 Wales aiin England an tha zawk

British Derby chu kan nghak chhuak ta a, inkhelh ṭan hmaa ṭawng pawr zawk Wales chu player nei ṭha zawk England-in nizan khan 2-1 in an hneh.

Stade Bollaert-Delelis, Lens-a inkhelah Gareth Bale-a goal hmangin Wales-in hma hruai hmasa zawk mah se England manager Roy Hodgson-a'n substitution awmze nei hmangin an ram ṭhenawm a lehthal. Second half-ah Jamie Vardy leh Daniel Sturridge te khelmual chhungah an lut a, Leicester City leh Liverpool striker te hian goal khat ve ve khungin Euro 2016-ah England-in chak hmel an hmu ta.

Robson-Kanu a tel

May 9 khan Reading chuan Hal Robson-Kanu contract an pawhsei loh tur an puang a, an striker duh loh hi Euro 2016 khel turin Wales tana koh a ni. Welsh striker hian a match hmasa berah substitute
aṭanga bul ṭanin Slovakia lamah chakna goal a khung a, British derby-ah inkhel bul ṭantir a ni. Robson-Kanu bakah hian Wales coach Chris Coleman-a'n an match hmasa ber aṭangin player pahnih a tidanglam a, Crystal Palace duo keeper Wayne Hennessey leh midfielder Joe Ledley te chu starting eleven-ah dah a ni.

England lamah erawh match hmasa bera an sawisel nasat Harry Kane-a'n hmun pawimawh a chang chhunzawm a, Roy Hodgson-a'n Russia an draw
ṭuma starting ngai bawk a hmang. Chumi awmzia chu England bul ṭantu panga zet chu Tottenham Hotspurs player niin Kyle Walker, Danny Rose, Eric Dier, Dele Alli leh Kane ten Wales an hmachhawn.

Hei le Bale

England player-te hi Premier League-a English player ṭha ṭha thlawn khawm an ni a, Wales erawh khawvel player man to ber Bale nei bawk mah se Real Madrid forward bak hi ha hipa fak tur an awm lo. England rama league sang ber dawttu Championship-a khel an awm nawk.

An ṭhat zawk ang ngeiin England-in bul an ṭha a, minute 7-na lekah Adam Lallana ball fing zet chu Raheem Sterling-a'n yard ruk lek aṭangin goal zawnah a pet thei lo a, Manchester City winger finishing hi a man nena sawi zawm chi pawh a ni lo. Team pahnih an fimkhur a, chance ṭha tak awm meuh lo.

Minute 25-naah Wayne Rooney freekick chu Gary Cahill-a'n tauh mah se Wales keeper Hennessey zawnah tak a kal a, hemi hnu lawk hian Harry Kane nena ball inchuh Ben Davies kut chu ball-in a per a, German referee Felix Brych-a'n penalty pekna turah a ngai lo. England-in hun chanve hmalamah goal khun ngeina tur chance nei tawh lo mah se Rooney corner pet Chris Smalling-a tauh chu a goal teuh hle.

First half tawp hma minute thum chauh a awm tawh tihin Rooney-a insum zo lo a, ball a hloh lak let a tumna lakah Robson-Kanu lakah ṭul lo takin freekick a chawi. Media hmaa England player-te deusawhtu Bale a rawn ding chhuak a, Slovakia laka freekick pet goal-tu khawvel player man to berin yard 28-a aṭangin British derby-ah goal a khung.

Vardy leh Sturridge

Hodgson-a'n second half ṭan phatah 'risk' la nghalin Kane leh Sterling aiah Vardy leh Sturridge te a luhtir nghal. Premier League-a Leicester City champion puitu Vardy-a'n offside ni ngeia lang aṭangin minute 56-naah a volley lut a, an replay nawn erawh chuan goal dik thlap a ni. English striker pass-tu hi Wales defender Ashley Williams a ni a, offside a ni lo.

England an phur chho a, minute 72-naah Lallana aiah Marcus Rashord a lut a, Manchester United striker hi Euro 96 hnu lama piang England tana inelna lian thama inlan thei hmasa ber a ni. Roy Hodgson-a hoten an nawr a, Chris Coleman hote an ṭangtluan thei lo. Injury time-ah Sturridge-a'n goal ṭha bik a khung a, striker ṭha bik chet hunah Liverpool striker-in goal pawimawh a khung.

Euro 2016 squad an puan a inhliam vanga paih tura mipui duh rawn khan England a chhandam a, point thum hlu tak an hlawhchhuah avangin Roy Hodgson-a hoten last 16 an lut ngei dawn niin a lang bawk.

Eng nge an sawi?

Wales goal khungtu Bale chuan, "Kan theihna zawng zawng kan chhuah a, kha bak chu tih theih kan nei tawh lo a ni. Player-ten an theihna zawng zawng an chhuah avangin ka chhuang a, round sang zawk thleng turin theihtawp kan chhuah zui ang," tiin a sawi.

Chakna goal khungtu Sturridge chuan, "Coach-in khelhna hun min pek avangin ka lawm a, ka thil tawn kha hriatthiam phak bak a ni," tiin goal a khung avanga a lawm thu a sawi.