Brazil coach thar Tite

World champion vawi nga ni tawh Brazil chuan Copa America Centenario quarterfinal an luh zawh loh avangin coach Dunga an ban a, a aiawh turin Corinthians coach Adenor Leonardo Bacchi (Tite) an la lut. Mahse, Brazilian Football Confederation (CBF) chuan August thla maia neih tur Rio Olympic-a an ram Under-23 team enkawl turin Under-20 coach Rogerio Micale an ruat thung.

Tun hnaiah Brazil hian coach an thlak ngun hle a, kum li chhungin Mano Menezes, Luiz Felipe Scolari leh Dunga te bakah kum 55-a upa Tite an ruai dawn tihna a ni.

Infiamna khawmpui lian Olympic-ah hian tun hmain Brazil hi an la champion ngai lo a, kuminah an rama an thlen dawn avang hian a vawi khat nan gold medal an beisei hle. Captain Neymer pawhin Copa America a khelh loh phah hial.

Thuchhuah siamin Brazila football thuneitu sang CBF chuan, "Brazilian Football Confederation chuan Rogerio Micale hi Olympic-a Brazil national team enkawl turin a ti chiang a, June 29 khian CBF hmunpuiah ram aiawh khel tur player puanchhuah a ni bawk ang," an ti.

Brazil team hian Olympic inbuatsaihna hnuhnung ber atan July 30 khian Japan chu friendly match an khelhpui ang. Rio Olympic-ah hian Group A-ah South Africa, Iraq leh Denmark te nen an inel dawn a ni.