Slovakia chakna Hamsik-a goal ropui

Nilaini zan Euro 2016 inkhelah Slovakia tan Marek Hamsik-a'n goal ropui a khung a, Russia lakah Slovakia chu 2-1 a hnehna chanpuiin last 16 luh beiseina an chhem nung ve zel.

Napoli midfielder Hamsik hian minute 32-naah Vladimir Weiss-a goal khung tur fing takin a siamsak a, minute 45-naah an goal hnihna hi a khung chhunzawm ve nghal - Slovakia thiampuipa hian field sir aṭangin Russia goal-ah a pet a, post chhung a fuh hnuah mawi takin a lut.

Russia tan Denis Glushakov chuan minute 80-naah goal khat a sut a, UEFA-in England laka buaina siam Russia fan-te chu buaina an siam leh a nih chuan Euro 2016 aṭanga paihchhuah an nih tur thu hrilh mah se an goal khung lawm hian stadium chhunga phal loh halmawi hal an awm leh hman!

Hamsik a langsar

Slovakia-in an match hmasa bera Wales an hmachhawn ṭuma Mark Hamsik che vel hmutu tan Napoli midfielder thiamna hi sawi nep theih a ni lo. Nilaini zanah pawh Hamsik hian ram tan innghahna ber a nihzia pholang nawnin goal ropui a khung piah lamah Russia tlarhnung a chhaih mangang ngun hle.

Wales an hmachhawn ṭum ang bawkin a ṭhian dang zawngte aiin ball pass a ngah a, Russia goal-ah vawi nga shot neiin an khingpuite ball ken lai vawi 12 a chhuhsak bawk. Weiss-a'n Slovakia goal hmahruai a khung theih nana ball vawrh pheitu Hamsik finna hi hmuh hmaih theih a ni lo bawk.

Qatari club Al-Gharafa tana khel Weiss hi European Championship-a Europe pawn lam club tana khel goal khung thei hmasa ber a ni.

Slovakia coach Jan Kozak chuan inkhelh zawhah Hamsik chungchang sawiin, "Hamsik hian Napoli a zawm hnuin hma a sawn nasa em em a, club lian tak tana khel turin tunah chuan a inpeih tawh a ni," a ti a, Euro zawh rualin Hamsik hian dawrtu a ngah viau a nih pawn a mak lo ang.

Russia buai a zual

Khelmual pawnah mai ni lo khelmual chhungah nen lam Russia an buai niin a lang ta. Leonid Slutsky-a enkawl team hian an match hnuhnung pasarihah vawi khat chiah chak hmel an hmu ta a, Fabio Capello ban a nih hnuah hlawhtling taka Euro 2016 khel tura Russia vawrhtu Slutsky dinhmun a him ta lo hle.

CSKA Moscow leh Russia enkawl kawptu manager hi kum 45 leka upa niin Euro 2016-a coach zingah a naupang ber a ni a, Slovakia an hneh lohna inkhelah hun tawp hamrik ham a nih rualin ngawi rengin a ṭhutnaah a ṭhu - hei hian Russia dinhmun chu chiang takin a hrilhfiah.

Russia hian Fedor Smolov hmangin hmahruaina hun ṭha nei mah se kum 26-a upa midfielder ball pet hi post sirah chiah a kal. Goal hmaah Russia tlarhma an hriam tawk lo a, vawi 15 lai shot nei chungin vawi khat chiah goal an khung.

Russia coach Slutsky-a'n inkhel ṭan tirh aṭanga Glushakov inkhel bul a ṭan tir lo chu a tisual niin a lang. Spartak Moscow player hian goal khat a khung piah lamah second half-a a luh hnuin Russia game a thlak danglam a, a ball pass zinga 97% chu a pass dik.