Italy hmaah Zlatan hoin Sweden

Zanin dar 6:30-ah Italy leh Sweden an inhmachhawn dawn a, Italy winger Antonio Candreva chuan Sweden thiampuipa Zlatan Ibrahimovic veng tura ruahmanna hranpa an siam loh thu a sawi.

Lazio winger chuan, "Ibrahimovic hi player ropui leh ṭha a ni a, mah se player mal veng turin kan inbuatsaih lo. Sweden hmachhawn turin kan inbuatsaih a, Belgium kan hmachhawn anga eng team pawh kan hmachhawn a ṭul a, Sweden laka hnehna chan kan tum," a ti.

Italy-in an match hmasa berah team ṭha zawka ngaih Belgium 2-0 in an hneh thei a, Republic of Ireland nena inhnehtawk Sweden lakah an game pangngai an khel a nih chuan Italy hi chak zawk tura beisei an ni.

Italy dinhmun

Italy-in ṭum dang ang lo takin player langsar an ngah tawk lo a, an innghahna ber chu coach Antonio Conte a ni. Season thara Chelsea coach tur hian Belgium an hmachhawn ṭumin
3-5-2 formation a hmang a, midfield laiah Marco Parolo, Daniele De Rossi leh Emanuele Giaccherini te inkawpin wing back-ah Antonio Candreva leh Matteo Darmian an awm a, Conte-a'n a ruahmanna a hlawhtlinpui.

Sweden lakah pawh Conte-a'n a formation ngai tho a hman beisei a ni a, players erawh hliam vanga a thlak danglam nual rin a ni. Belgium lakah second half-ah Matteo Darmian lak chhuah a ni a, Manchester United player hian hliam tenau a neih avangin a aiah Milan full-back Mattia De Sciglio emaw Alessandro Florenzi-te chuan inkhel bul an ṭan beisei a ni.

Daniele De Rossi aiah Thiago Motta chuan inkhel bul a ṭan beisei a ni a, Italy tan Belgium laka goal khungtu Graziano Pelle chuan an match hmasa bera a hliam vangin training a la zawm thei lo a, mah se Southampton striker hi Sweden hmachhawn hman tura a dam hman tur thu sawi a ni a, Conte-a'n hliam damkawr striker aia Ciro Immobile emaw Simone Zaza-a luhtir an nih pawhin a mak lo ang.

Sweden ve thung

Sweden in Republic of Ireland an hmachhawn ṭumin 4-4-2 formation an hmang a, ṭum dang ang bawkin Zlatan Ibrahimovic chu an innghahna a ni. Mahse, Milan, Juventus leh Inter Milan striker hlui hian an si phurh sutna tur goal luh nan ball a cross tih loh chu Ireland lakah a langsar lo a, zaninah a hriatchian Italian player rual a hmachhawn dawn avangin tlangnel hle tura ngaih a ni.

German club Hamburg tana khel Sweden midfielder Albin Ekdal chuan, "Italy hi kan beisei aiin an ṭha a, a tirah Belgium huphurh zawk mah ila Italy khelh dan ka hmuh hnuah ka ngaihdan ka thlak tawh. A bik takin defence-ah an khauh em em a, paltlang an harsa dawn a ni," tiin Italy hmachhawn a harsat tur thu a sawi.

Mahse, Italy hian inelnaa Sweden an hmachhawn hnu-hnung parukah goal an la chhuah vek a, Swedish tlarhma ten Italian tlarhnung an hlau lo tih a lang - hei erawh hriat reng a ṭha,
Sweden an hmachhawn hnu-hnung paliah Italy an la tlawm lo.