Chelsea-in Kai Havertz an hnaih

Kai Havertz chungchangah Chelsea leh Bayer Leverkusen hi pound maktaduai 72-in an inrema ngaih a ni a, bonus nen chuan Germany midfielder man hi a la pung chho thei ang.

Blues leh Leverkusen hi hun rei tak an indawr tawh a, July thla khan London club hian euro maktaduai 65 (£58.6m) bakah a chet ṭhat dan a zira euro maktaduai 15 pek belh thei turin an dawr tawh a, German club-in an hnawl.

Tuna an inremna angah hi chuan Leverkusen-in Kai Havertz manah euro maktaduai 80 (£72m) an dawng phawt ang a, euro maktaduai 10 an dawn belh leh thei dawn. Hemi bakah hian euro maktaduai 10 dawn theih dan a la awm a, hei erawh kum nga chhunga Chelsea-in Champions League nomawi an chawi te a ngaih dawn avangin a 

harsa ang.

Havertz hian Chelsea nen hian kum nga chhung inremna an nei tawh a, Thawhṭanni khan Leverkusen manager Peter Bosz chuan team zingah a training tawh loh thu a sawi.  Leverkusen hian Havertz bakah Kevin Volland an chan hmel a, German forward hian Monaco a zawm a rinawm. 

Chelsea hian Havertz hma hian Hakim Ziyech (£37m), Timo Werner (£47.5m), Ben Chilwell (£50m) bakah a thlawnin Thiago Silva leh Malang Sarr te an lalut tawh. German midfielder Havertz an lalut thei a nih chuan pound maktaduai 200 chuang an hmang dawn tihna a ni.

Kum 21 mi Havertz hian Bundesliga-ah match 118 a khel tawh a, goal a khung theih avangin Chelsea player manto ber ni thei dinhmuna a ding pawh hi a mak lo. Leverkusen hian Havertz thlak nan Roma forward Patrick Schick an ngaihven a, Czech Republic forward hi euro maktaduai 28 vela lak theih an inbeisei a ni.