Moyes-a hote'n Barcelona an hneh

Manchester United-in an manager ropui Sir Alex Ferguson thlak turin David Moyes an la lut a - 'The Chosen One' hming lem an vuah hial. Amaherawhchu, Everton boss hlui hi a hlawh­chham a, season khat a daih lo. Tunah chuan Moyes hian Spanish club Real Sociedad a enkawl tawh a, kum 2015 a game hmasa berah Barcelona a hneh.

Pathianni zan inkhelah hian Barca left back Jordi Alba-a'n minute hnihna lekah an lamah an ti-goal a, he goal vang hian Anoeta Stadium-ah Real Sociedad 1-0 in an chak. Barcelona hian hmahruai theihna hun ṭha an bawhpelh.

Barca boss Luis Enrique a inringtawk a, Lionel Messi leh Neymar te chu bench-ah a ṭhuttir. South American forward pahnihte hian player dang aiin ni hnihin chawlh an nei rei hret a, hei hi an awlna chhan pawh niin a lang. Ani pahnih bakah hian Gerard Pique, Dani Alves leh Ivan Rakitic te chu bench mawitu an ni.

Minute hnihna lekah Sociedad-in short corner an pet a, Sergio Canales chuan cross ball vawrh lutin Alba-a'n an lamah tilut. Barca keeper Claudio Bravo chuan an club hlui a hmachhawn hmasa berah a chhuah nghal.

Barcelona-in inkhel an thunun a, minute 21-naah chance hmasa ber an nei a; midfielder Xavi-a'n yard 25 aṭangin a pet over. Luis Suarez-a'n chance a rawn siam a, Uruguay forward hian Pedro tan ball ṭha pein Spanish forward-in target-ah a pet thei lo.

Sociedad an vannei chhunzawm a, Pedro cross chuan Inigo Martinez vei lam per mah se referee Carlos Del Cerro a ngawi tlat.

First half tawp hma hretin Munir El Haddadi aiah Lionel Messi a rawn lut a, second half ṭan aṭanga minute 10 pelh hretah Pedro aiah Neymar an luhtir bawk.

Barcelona-in inkhel an thunun chhunzawm a, Andres Iniesta hmangin an siphurh an sut teuh hle. Chutihrualin Barca tlar hnung a phui ṭha lo, Alberto De La Bella cross chu keeper Bravo-a'n a chhut sual a, Xabi Prieto-a'n a tauh over hlauh.

Sociedad goalkeeper Geronimo Rulli mamawh hunah a che ṭha a, Rulli hian Xavi leh Suarez te goal khung tur dan sak a, minute 90 chhung goal a chhuah lo a. Sociedad 1-0 in an chak ta a ni.

Moyes a lawm

Sociedad boss Moyes chuan, "Ka awm dan chu Everton ka enkawl hunlai ang kha a ni. Arsenal, Liverpool leh Manchester United te hneh tur kha ka ngaihtuah nasa ṭhin. Everton leh United ka enkawl lai khan Barcelona chungchang hi kan sawi nasa ṭhin a, ka ngaisang a, an laka point hmuh hi a awlsam lo tih ka chiang. Hun ṭha ka neih hmasak bera ka hneh thei lawmawm ka ti a, goal kan thun hma avangin hun a kal muang duh hle," tiin a sawi.

Moyes chuan sawi chhunzawmin, "Club lian ka lo enkawl ve tawh avangin Messi leh Neymar kha an awltir ka ring sa a, Barca-in squad an neih len avangin Enrique khan a tihsualna ka hre lo. Krismas chawlh hi England-ah pawh nei ve se a ṭhain ka hria, manager leh player-te pawhin season tluanin inkhel hmuhnawm zawk an lantir thei ang," a ti.

Squad chungchang sawiin, "Barca, Real Madrid, Atletico, Valencia leh Sevilla te hi elpui ve theih ka duh a. Chumi tur chuan squad chhah zawk kan mamawh dawn a ni," a ti.

Enrique in sawifiah

Barcelona manager Luis Enrique chuan, "Messi, Neymar leh Alves te zinna kha a thui deuh a, midang aiin training an neih tlem bawk avangin minute 90 chhung khel tur chuan ka hmang ngam lo. Amaherawhchu, hetiang result ka hmuh takah chuan tuna ka thutlukna ang hi chu ka siam nawn ngam tawh kher lo ang," tiin a sawi.