Champion lai Arsenal an kal zel

Arsenal-in FA Cup champion nomawi humhim turin nikum final-a an hneh Hull City chu 2-0 in an hneh.

Pathianni zana inkhelah hian Per Mertesacker chuan minute 20-naah Alexis Sanchez-a corner pet a tauh lut a. Chile forward Sanchez-a'n minute 82-naah goal hmangin Arsenal chakna a nemnghet.

Arsenal-in Emirates Stadium-ah first half an thunun a, 65% lai ball possession nei mah se goal khat bak an khung thei mai lo.

Hull City boss Steve Bruce-a'n Everton hneh thei team aṭangin player 10 lai a thlak danglam. Tigers hi Premier League-ah an dihmun a ṭhat loh avangin FA Cup dah pawimawh thei an ni lo a, season thara English league sang bera khelh a duh zawk avangin West Brom leh West Ham an hmachhawn tur atan player an indah ṭha.

Second half-ah Hull City hian nasa zawkin pressure pe mah se Gunners keeper David Ospina-a'n hna tak tak a nei lo.

Arsenal starting eleven-ah khup hliam vanga hun rei tak chawl tawh Theo Walcott a inlan a, minute 75 a khel thei.

Hun tawp hma minute riat la awmin Santi Cazorla pass chu Sanchez-a'n goal-ah a chantir a, Arsenal 2-0 in an chak.

Eng nge an sawi?

Hull City manager Steve Bruce, "Ngaihdan dik tak sawi tur a nih chuan Arsenal khan chak an phu a ni. Inkhel ti nung turin theihtawp kan chhuah a, tlar hmaah kan hriam tawk lo a ni. Pawi ka tih lai ber chu Arsenal goal hmahruai kha tun season-a corner aṭanga kan goal chhuah vawi khatna a ni. Team dang pawh an inhliam ve tho a, player paruk aṭanga pasarih chhawr theih loh an awm chuan a chet theih loh. Chhuanlam erawh siam ka tum lo, team

ṭha zawk an chak a ni," tiin a sawi.

Arsenal boss Arsene Wenger chuan, "Chawlh tir kan tum zet a, amaherawhchu amahin khelh a duh avangin Sanchez kha ka luh tir a ni. Player-in inrintawkna an neih chuan khelh tir zel a fuh ṭhin a, ani bik chu a fitness a ṭha a, player ṭha bik a ni," tiin a sawi.

Arsenal hian season tir khan pound maktaduai 35-in Sanchez hi Barcelona aṭangin an lei a, Chile forward hian London clubt an goal 16 a khung tawh a. Goal khung lama Arsenal innghahna ber a ni.

Kum zawna FA Cup chawi theite

The Wanderers (1871-72, 1872-73)

Blackburn Rovers (1889-90, 1890-91)

Newcastle United (1950-51, 1951-52)

Tottenham Hotspur (1960-61, 1961-62)

Tottenham Hotspur (1980-81, 1981-82)

Arsenal (2001-02, 2002-03)

Chelsea (2008-09, 2009-10)