Basketball inelna lian Mizoram Super League
MBBA leh Zonet buatsaih Mizoram Basketball inelna sang ber neih tur atana inbuatsaihna ngawrh taka neih zel a ni a, December 29, 2014 khan club 1st Inspection neih a ni a, MSL playoff khel tur leh MSL khel tura tling sa club lehkha pawimawh enfelna hmasa neih a ni. MBBA 1st Division club awmsa te’n MSL criteria an zawm thei vek a, MSL khel tura tling nghal an ni.
MSL Playoff khel thei tura dilna thehlut club paruk zingah club pangate’n January 27, 2015 a ṭan tur MSL Playoff hi an khel thei dawn a ni. Playoff hi Zarkawt Basketball court-ah khelh a ni ang.
# MSL khel thei tura qualify club-te:
1) Khatla TBL
2) Zarkawt Serpents
3) Zarkawt BCA
4) Mission Veng Vikings
5) Chaltlang Ryders
# MSL Play-off khelh tur club te:
1) Hollow BBSP
2) KK BC
3) BC Bethlehem
4) Tuikual
5) Chawnpui VR4
MBBA INBUATSAIHNA
MBBA chuan MSL atan inbuatsaihna ngawrh takin a kalpui zel a. MSL atan hian club leh player ziahluh hun pawh a bikin December 15–20,2014 inkar khan a hawn a ni. Heng player te hi 2015-16 season atan rin nghal tur an ni a, MBBA season inṭan huna player ziahluh hunah an che ve thei dawn lo a, mid–season transfer hunah chauh an chetsawn phalsak an ni tawh ang.
MSL danin a phal angina state pawn leh foreign player bakah free man ziahluh hun 13-17 January, 2015-ah hawn a ni leh dawn a, heng player te hi playoff khel tur tan pawh an chhawr theih dawn a ni. MSL leh MSL playoff khel tur hian player 15 neih tlin ngei ngei tur a ni a, player 18 thleng ziahluh theih a ni. Playoff khel tur club te inbuatsaih dan enin Mizo players ṭha tak tak bakah state pawn player eng emaw zat MSL playoff-aṭang hian kan hmuh a rinawm.
UNDER 18 PLAYERS
Player naupang zawkte tan MSL Board chuan MSL khel tur leh khelh tumte chu Under 18 player pahnih tal nei ngei ngei turin a ti a, Under 18 player-te hi club-in inkhelh tur an neih zawng zawng zinga Match khatah tal an inlan tur a ni. Khelh rei hunchhung erawh club thuneihna hnuaiah dah a ni thung.
PLAYOFF KHELH DAN TUR
MSL Playoff hi League a khelh tur a ni a, club pangate vawi khat ṭheuh an inkhelh kual hnuah pakhat tlain, a sang paliten semi final an khel ang. Semi Final atang hian knock-out a khelh tur a ni,
COACH & ASST. COACH
MSL Board duhdan angin Coach leh Asst. Coach-te hi MBBA hriatpui coaching certificate nei an ni tur a ni. Club dang enkawl phalsak an ni lo a, club enkawl lai an nei lo a nih chuan engtik hunah pawh club-in a la lut thei thung a ni. Bench Area-ah coach leh asst. coach an awm thei a, team manager an awm phalsak an ni lo. Coach atan hian MBBA hnuaia trainers’ training zir chhuak chin pawm an ni.
MSL ENTERTAINMENT PACKAGE
MSL hi Mizorama basketball inelna sang ber a nih bakah entertainment package lian tak tura duan a ni a, ṭhalai lam thiam tak tak te lamtual a ni tel dawn a ni.
DANCE BATTLE
MSL Club behchhanin Dance crew hrang hrang tan platform siam a ni dawn a, club tin ten Home & Away Dance Crew an nei dawn a ni. Inkhelh hma apiangin Dance Battle neih thin a ni anga, a chak zawkin Rs.1,000/- an dawng ṭhin ang. Season tawpah Best Dance Crew thlan an ni anga, lawmman Rs.10,000/- an dawng ang. Dance Crew hi club-ah an in affiliate tur a ni a, a management erawh club-in a duh zawk a nih loh chuan, club management tibuai loin a hrangin a kal thung ang.
CHEER LEADERS
MSL khel tur club tinin cheer leaders an nei vek tur a ni a, cheer leaders member hi hmeichhia 5 tal an ni tur a ni. Home team an nih chauhin cheer leaders hi an inlan phalsak an ni dawn a, team auphur tur leh boruak siam tur club member pawimawh tak an ni ang.