Match 22 zawhah Real Madrid an tlawm
A zawna vawi 22 lai chak tawh Real Madrid chuan Valencia hneh loin kum 2015 bul an ṭan a, La Liga hmahruaitu erawh an ni chhunzawm zel.
Minute 14-na lekah Cristiano Ronaldo-a'n penalty aṭangin Real Madrid hmahruaina goal a khung a, tun season-a Portuguese forward goal 33-na a ni.
Second half ṭan aṭanga minute sarihnaah Antonio Barragan goal hmangin Valencia-in an sut a, Nicolas Otamendi-a'n minute 65-naah chakna goal a khung zui leh bawk. Real Madrid-in September 13-a Atletico Madrid laka an tlawm hnua an chak loh lehna hmasa ber a ni.
Valencia hian point 34 hmuin palinaah an awm a, match khata khel tlem Real Madrid-in point 39 hmuin hmahruaitu an ni chhunzawm zel thung.
Real Madrid manager Carlo Ancelotti-a'n player ṭha a awl tir lo a, starting eleven-ah Ronaldo, Gareth Bale, Benzema, Toni Kroos leh James Rodriguez te an inlan nghal. Alvaro Negredo hand ball vanga penalty chu Ronaldo-a'n a khung nghal mai avangin Real tan harsa tur awmin a lang lo. Ronaldo hian goal hnih khung theihna tur a nei nghal a, keeper Diego Alves a bum hnuah a khung lo.
Valencia chak an tum a, first half-ah player panga ngawtin yellow card an hmu a, hun chanve tawp hma hretin Andre Gomes-a'n goal ban a pet per bawk.
Second half-ah Valencia an che ṭha zawk a, Liverpool player hlui Barragan-a ball pet chu Real defender Pepe-a'n a lo khawih pen avangin keeper Iker Casillas tan dan theih a ni lo. Real forward Bale goal khung tur chu Otamendi-a'n a tackle hman a, Argentine defender hian minute 65-naah chakna goal a tauh lut zui bawk.
Valencia tan Negredo-a'n chance ṭha an nei a, Isco hmanga Real Madrid si phurh sut theihna chu keeper Diego Alves-a'n a dan sak bawk.
Real-in goal an khung belh theih loh avangin an tlawm a, Nilaini zan hian Copa del Rey Round of 16-ah Atletico Madrid an hmachhawn ang.
Thlasik chawlh laiin Real Madrid hian Dubai-ah sponsor-te tih lawm nan AC Milan nen friendly an khel a, 4-2 in an chak lo. Milan nena an result hi pawimawh lo mah se player-te an rim deuh tih Pathianni zana an inkhelh ṭumin a lang chhuak.
Real Madrid manager Carlo Ancelotti chuan, "Kan chance neih ang kan hmang ṭangkai lo a, chutihrualin football-ah chuan eng pawh thleng thei a ni. Tlar hma lamin goal an khung thei reng bik lo. Match 22 kan chak hnua kan chak loh vawi khatna a ni a, kan khelh dan hmang kan hriat chian avangin kan buai phah ka ring lo," tiin a sawi.
La Liga Results
Getafe 1 - 2 Rayo Vallecano
Valencia 2 - 1 Real Madrid
Espanyol 1 - 2 Eibar
Real Sociedad 1 - 0 Barcelona
Team Dinhmun
# Team Pld W D L GF GA GD Pts
1 Real Madrid 16 13 0 3 56 15 41 39
2 Barcelona 17 12 2 3 41 8 33 38
3 Atletico Madrid 17 12 2 3 34 15 19 38
4 Valencia 17 10 4 3 31 14 17 34
5 Sevilla 16 10 3 3 26 17 9 33
6 Villarreal 17 9 4 4 29 16 13 31
7 Malaga 17 9 3 5 21 17 4 30
8 Eibar 17 6 5 6 21 23 -2 23
9 Celta de Vigo 17 5 5 7 17 19 -2 20
10 Espanyol 17 5 5 7 21 26 -5 20
11 Rayo Vallecano 17 6 2 9 19 32 -13 20
12 Athletic Bilbao 17 5 4 8 14 21 -7 19
13 Real Sociedad 17 4 6 7 18 22 -4 18
14 Getafe 17 4 5 8 13 22 -9 17
15 Almería 17 4 4 9 15 25 -10 16
16 Deportivo La Coruna 17 4 4 9 14 27 -13 16
17 Levante 17 3 6 8 13 33 -20 15
18 Granada 16 2 7 7 10 26 -16 13
19 Elche 17 2 5 10 15 34 -19 11
20 Córdoba 16 1 8 7 11 27 -16 11