Chelsea an chak; Saints an inhnehtawk

Stamford Bridge-ah Chelsea-in second half-a an goal thum khung hmangin Cham­pionship club Watford 3-0 in an hneh a. St Mary's Stadium-ah Southamp­ton-in mikhual Ipswich Town an draw a, January 14 hian Portman Road-ah replay an khel ang.

Subsitution awmze nei

Chelsea boss Jose Mourinho-a'n Tottenham an hneh loh ṭuma starting eleven aṭangin player pariat ngawt a ti danglam a; player pawimawh Cesc Fabregas, Nemanja Matic, Diego Costa leh Eden Hazard te'n Blues tan bul an ṭan lo.

Chelsea-in midfield an thunun thei lo a, first half-ah game nung lo takah goal a lut lo. Second half ṭantirhah Diego Costa leh Willian te an inlan a, inkhel a nung sawt.

Amaherawhchu Watford-in second half-ah chance ṭha an nei hmasa a, Troy Deeney ball pet chu defender Filipe Luis a per hnuin a goal teuh hle.

Minute 58-naah goal a lut a, substitute Willian-a'n goal class tak a khung a. Watford lamin tlawm mai tum lo mah se Loic Remy leh Kurt Zouma te'n goal khat ve ve an khung belh avangin tih theih an nei lo. Hun tawpah Chelsea 3-0 in an chak.

Ipswich an ṭang tluan

St Mary's Stadium khatin mipui an pung khawma Premier League-a beisei phak baka che ṭha Southampton-in an khingpui Championship club Ipswich Town an hneh zo lo.

Southampton-in inkhel thun mah se minute 19-na lekah Tyrone Mings cross chu Darren Ambrose-a'n a tauh lut a. Ipswich keeper Dean Gerken leh defender Christophe Berra te communication ṭhat tawk loh zarah Morgan Schneiderlin-a'n minute 33-naah an siphurh a sut.

Chakna goal khung thei turin Saints-in hun an ngah tawk a, mah se Graziano Pelle, Steven Davis leh James Ward-Prowse te vanneih ni a nih loh avangin goal dang an khung thei lo.

Replay khelh a

ṭul dawn avangin hian Saints fixtures a harsa sawt dawn a. January 11-ah Manchester United an hmachhawn anga, chumi zawhah Ipswich Town (January 14) leh Newcastle (January 17) an hmachhawn leh nghal ang.

Hemi chungchang hi sawiin Southampton manager Ronald Koeman chuan, "Replay khelh a ngai a, ka besei lawk loh thil a nih avangin ka lungawi lo hle. Player thlak danglam vak hi ka ṭawmpui ve lo a, chuvangin kar leh lama thil awm dan tur hi hriat thiam a har ta khawp mai," tiin a sawi.