Manchester kalkawng a awlsam lo

FA Cup third round-ah Manchester khaw club pahnih City leh United-in an game hmasa berah division hnuai lam club Sheffield Wednesday leh Yeovil Town an hneh a, an chak dan erawh a awlsam lo ve ve.

Etihad Stadium-ah Atdhe Nuhiu goal hmangin Sheffield-in hma an hruai a, Manchester City-in second half-a James Milner goal hnih hmangin 2-1 in an chak. Huish Park-ah Manchester United-in first half-ah goal an khung thei lo a, Ander Herrera leh Angel Di Maria goal hmangin 2-0 in an chak. United hian knockout inelna ngaihhlut loh zawkah MK Dons hneh loin an lo tla nghal tawh a, Pathianni zanah pawh hian player manto rualin game mumal an khel thei lo.

Birthday Boy 'Milner'

Premier League-ah hma­hruaitu pahnih an awm a, chung zinga pakhat chu Manchester City an ni. City hian an mikhual Championship club Sheffield Wednesday hmaah team ṭha an ni tih an lantir thei lo.

Nikum September thla khan Capital One Cup-ah City hian 7-0 laiin Sheffield hi hneh mah se darkar khat chuang zet goal zawnah an pet lo.

Mikhual team hian minute 14-naah Nuhiu hmangin hma an hruai a, Stevie May leh Kieran Lee te thawhrah a ni. City-in game mumal an khelh theih loh avangin Samir Nasri leh David Silva te minute 61-naah an luh tir a, playmaker pahnih thawhrah sengin minute 66-naah Milner-a'n City si phurh sutna goal a khung. City hian Sheffield Wednesday goal zawna an petna hmasa berah goal an khung.

Goal luh hnuah City-in inkhel an thunun a, minute 90-naah Jesus Navas cross chu goal ruakah Milner-a'n a khung a, City chakna goal a ni. English midfielder hian a kum 29 tlin champhaah goal hnih a khung a, tun season-a a goal thum khungna chauh a ni.

Yaya Toure tan African Cup of Nations khelh hmaaa City tana a game hnuhnung ber a ni dawn a, Ivory Coast an chet ṭhat chuan City-in an midfielder pawimawh hi an chhawr lo rei dawn tihna a ni.

Eng nge an sawi?

Manchester City manager Manuel Pellegrini chuan, "Ṭum dang kan pha lo a, kan khel chhe takzet a ni. Chutihrualin striker mumal nei loa khel kan ni a, heti chunga hnehna kan chang thei a lawmawm a ni," tiin a sawi.

Sheffield Wednesday manager Stuart Gray chuan, "Bul kan ṭan ṭha a, City tan harsat­na kan siam nasa hlein ka hria. Amaherawhchu, ka lo sawi tawh ṭhin angin bul ṭan ṭhat aiin a tawp khar ṭhat a pawimawh zawk," tiin a sawi.

Di Maria is back

Manchester United-in Robin van Persie hahdam tir mah se starting eleven-ah Wayne Rooney leh Radamel Falcao te an la chhawr thei tho. Midfield-ah Juan Mata leh Michael Carrick te awm loh a langsar a, Darren Fletcher leh Ander Herrera te'n inkhel an kaihruai ṭha tawk lo.

United-in beisei an pha lo a, wing back pahnih Rafael leh Luke Shaw chu halftime-ah inhliam vanga lakchhuah an ni. Minute 60-naah Falcao aiah Di Maria luh tir a ni a, Argentine winger hian danglamna thlen nghalin a luh aṭanga minute lina lekah Herrera goal khung tur a siam sak nghal.

Yeovil-in phur takin nawr let mah se Joseph Edwards goal khung tur chu Di Maria-a'n a lo dan sak.

Hun tawp hma hretin Argen­tine winger hian Yeovil keeper Jed Steer pet khumin goal a khung zui a, ball pass-tu hi captain Rooney a ni. United 2-0 in an chak.

Manchester United boss Louis van Gaal chuan, "Mi zawng zawng ngaihdanah chuan Manchester United an ni a, euro maktaduai 100 man leh pound 5000 man inelnaah an ngai a. Amaherawhchu, football chu chutiang ringawt a ni lo, Yeovil Town manager anga team-in player-te mumal taka a rem chuan theih loh a awm lo. Kan khingpuite an khel ṭha a, keini kan khel ṭha tawk lo nachungin kan chak thei kha ka lawm takzet a ni," tiin a sawi.