Euro 2016 Germany leh Poland-in point insem

World champion Germany-in Ningani zana Poland an draw avangin 2016 European Championship last 16 lut turin match khat dang an la nghah a ngai.

Group C inkhel dangah Ukraine-in Northern Ireland an hneh lo a, Mykhaylo Fomenko hote hi tun inelnaa tla hmasa ber an ni.

Stade de France-ah Germany leh Poland ten goal an khung thei lo a, ram pahnih hian point li ve ve hmuin group match hnuhnung bera point an hlawhchhuah hrim hrim chuan knockout stage an lut ve ve ang.

Lyon-ah West Brom defender Gareth McAuley leh Niall McGinn te goal hmangin Northern Ireland 2-0 in an chak a, inelna aṭangin an khingpui Ukraine an hnawt chhuak bawk.

Tlarhma bil

Germany-in match hmasa berah striker pangngai hmang loin 2014 FIFA World Cup final-a chakna goal khungtu Mario Gotze chu hma tawngah an hmang a, inhliam vanga season hmang ṭha lo midfielder hi a hriam tawk lo. Joachim Low-a'n Poland an hma-chhawn ṭumin Gotze chungah rinna a nghat chhunzawm a, Ukraine an hneh ṭum aṭangin pakhat chiah a tidanglam - Shkodran Mustafi aiah tawnhriat nei ṭha zawk Mats Hummels a inlan.

Entu 73,648 hmaah Die Mannschaft (Germany sawina)-in bul ṭan ṭha zawkin ball an chang tam a, minute thumna leka Julian Draxler ball cross chu Gotze-a'n goal zawnah a tauh thei lo a, wing back Jonas Hector ball pet lah goal zawnah a kal lo. Germany tlarhnung a khawng ṭha a, Robert Lewandowski leh a hoten goal khung theihna hun ṭha an nei lo.

Milik a vanduai

Second half ṭan chiahah Germany an chebuai nghal a, Kamil Grosicki cross ṭha chu Poland striker Arkadiusz Milik-a'n hnai tak aṭangin a tauh goal thei lo a, hei aia chance ṭha hi minute 90 chhungin hmuh tur a awm lo. Hemi hnu hian Lewandowski-a'n goal khung theihna hun ṭha a neih chu German defender Jerome Boateng-a'n a dang hman. Bayern defender hi man of the match a thlan a ni.

Germany midfielder Mesut Ozil chuan yard 18 aṭangin goal-ah a pet a, Wojciech Szczesny inhliam vanga starting chang Lukasz Fabianski-a'n a dang ṭha hle. Minute 20 khelh tur a la awmin Mario Gomez a rawn inlan a, hemi hmaa lut André Schurrle nen inkhel result tidanglam thei tur khawpin field chhungah an khawsa lo.

Eng nge an sawi?

Germany coach Joachim Low chuan, "Inkhel pumpui thlir ila, draw hi result awm tak ni mah se kan khelh danah ka lawm lo. Tlarhnung lam kan rem phui ṭha a, goal khungna chance kan pe meuh lo. Amaherawhchu goal khung turin kan nawr na tawk lo a, midfield-ah thawkrim mah ila a tawp zo tur kan awm lo," tiin an tlarhma bil thu a sawi.

Poland coach Adam Nawalka chuan, "Germany kha hmun awl pek zauh lai kan nei a, chu chu insiam-
ṭhat kan mamawhna lai a ni. Amaherawhchu counter attack erawh kan hmang ṭangkai viau a, Northern Ireland kan khelh ṭum ai pawhin kan khel ṭha tawh zawk. Germany goal awm loa kan draw thei hi kan tan chuan result ṭha tak a ni," tiin a sawi.

N Ireland an chak

European Championship-ah Northern Ireland a vawi khatna atan an chak a, 1982 FIFA World Cup-a hnehna an chan hnua inelna lian thama an chak lehna hmasa ber a ni. Michael O'Neill hote hi Ningani zan hian an khel ṭha a, Ukraine laka hnehna chan hi an phu hrim hrim a, last 16 luh beiseina an nei ve zel bawk.

N Ireland tana goal khungtu McAuley hi kum 36 leh ni 194-a upa a ni tawh a, Euro-ah ani aia goal khung thei upa chu Austria tana Euro 2008-a goal khungtu kum 38 leh ni 257-a upa Ivica Vastic chiah a awm.

Result lawmawm hi chanchin duhawm loin a chhunzawm a, Northern Ireland ṭantu Robert Rainey chu Stade de Lyon-a an ram chak a en laiin lungphu chawl vangin a thi. Kum 62-a upa Rainey chhung-te chuan, "Kan channa avangin hrehawm kan ti a, chutihrualin kan hrehawmna min ṭawmpui a, min tawrhpuitu zawng zawng chungah lawmthu kan sawi a ni. Robert hian nuam a tihna berah a nunna a chan a ni," tiin an sawi.

Thawhṭanni khan Northern Ireland ṭantu kum 24-upa Darren Rodgers chu Nice-ah khawlai veivahna aṭangin tuipui kam lung hmuna a tlak avangin a thi tawh bawk a, Euro 2016-ah Northern Ireland ṭantu pahnih an thi tawh.