Santosh Trophy Squad an puang ta

India rama football inelna ngaihhlut hlawh ber zinga mi, state leh state inelna sang ber National Football Championship for Santosh Trophy Northeast Zone qualifier chu January, 2015 hian Assam-ah neih a ni dawn a, Mizoram Football Association chuan he intihsiaknaa tel tur player 20 a thlang fel ta.

Mizoram team hian Krismas chawlh pawh hmang ve hman meuh loin nikum December aṭangin training an nei tawh a, tunah hian an la chhunzawm zel. AIFF lamin Santosh Trophy khelh hun tur hi a tichiang tlai deuh a, December 20-ah hriattirna tihchhuah a nih chauh avangin MFA Technical Committee chuan hma a la zui nghal a, Krismas chawlh hunlaiin player-te hian training an nei nghal a ni.

National Games

MFA chuan February 1-10 chhunga Kerala-a National Games khelh turah team ṭha tak tih tumin ṭan a la mek bawk a, he team-a tel thei tur players thlan chhin (probables) pawh nei tawhin anni lam pawhin nikum lamah training hi an nei tawh a, Krismas chawlh an hman hnuah vawiin hian training an chhunzawm leh dawn a ni.

National Games-ah hian India rama state ṭha pariat an inel dawn a, hei hi nikum lama Santosh Trophy-a tiṭhate chiah tel theihna a ni. MFA chuan heta tel tur team hi a din mek bawk a, anni hi chu Kerala-a kal turin an insawr bing ang a, anni ni lo Santosh Trophy-a khel tur team an awm bawk a ni.

Northeast Zone

Santosh Trophy Northeast Zone hi AIFF hnuaia team ṭha tamna zinga mi a ni. Season hmasa khan Northeast state pasarih bakah Railways-te dah tel an ni a, Mizoram leh Railways hian final round an lut.

Final round-ah Mizoram chu champion-in final-a an hneh chu Railways hi an ni. Railways hian final round thleng turin Northeast Zone-a an group-a awm Assam leh Meghalaya-te an hneh hram a ni. Mizoram pawhin final round kalkawngah Manipur chu an hneh hram a, chuvangin Santosh Trophy finalist pahnihte hian Northeast Zone paltlang ringawt pawh an harsat hle tih season hmasa khan Aizawlah kan hmu tawh.

Kumin Northeast Zone-ah hian Group A-ah Assam, Manipur, Arunachal Pradesh leh Tripura-te an awm ang a; Group B-ah Mizoram, Meghalaya leh Tripura-te an awm thung ang.

Mizoram hian January 19, 2015-ah Tripura a hma­chhawn ang a, January 23-ah Meghalaya a tum leh ang. Group B atanga point hmu sang berin final round an lut ang a, final round khelhna tur leh a hun hi tihchian a la ni lo.

He tia en mai chuan Mizoram hian Tripura hi chu an hneh theih hmel a; nimahsela nikum Dr T Ao Memorial Football final-a Lammuala goal awm loa an draw-pui Meghalaya an hneh tel a ngai dawn a, group awlsam tak a ni hauh lo ang.

Santosh Trophy

India rama state leh state football inelna lian ber a ni a, kumin hi a vawi 69-na tur a ni. Nikum khan Mizoram chu a vawi khatna atan a champion a, tun hmain quarter final a la pêl phak ngai lo.

AIFF lamin calendar an tichiang thei lawk lo a, kuminah chawpchilh takin Santosh trophy khelh hun tur hi an puang. Zonal rounds hi January chhunga khelh zawh tura tih a ni. India ram hi zone pangah an ṭhen a, zone tin a tiṭha pahnih zelin final round an khel ang.

Final round khelh hun hi tihchian a la ni lo a, Uttarakhand-a nghah tura rel phawt a ni a; nimahsela AIFF lamin Uttarakhand-a khelmual leh player-te thlenna tur hmunte an enfiah hnuah an thlen theih leh theih loh a chiang thei chauh dawn a ni.

1941 aṭanga khelh ṭan niin Bengal an champion ngun ber a, vawi 31 an champion tawh. Anni bakah hian champion tawh team 11 awmin chungte chu - Punjab (8), Kerala (5), Goa (5), Maharashtra (4), Karnataka (4), Railways (3), Services (3), Andra Pradesh (3), Delhi (1), Manipur (1) leh Mizoram (1) te an ni.