Murray-a'n Quarterfinal lut

Ningani zan khan World number 2 Andy Murray chuan Britain tennis player tho Aljaz Bedene lakah straight set-a hnehna changin Aegon Championship quarterfinal a inhlangkai.

Queen's Club, London-a inkhelah Britain number 1 Murray hian 6-3, 6-4 in hnehna a chang a, quarterfinal-ah chuan Kyle Edmund a hmachhawn zui leh ang.

Kum 29-a upa Murray hian British player a hmachhawn khat hle a, Bendene hmaa English mi a hmachhawn hnuhnung ber chu kum 2006 daih tawh kha niin Bangkok-ah Tim Henman a hneh lo a ni.

Aegon Championship-a vawi li champion tawh Murray chuan, "Quarterfinal-a ka hmachhawn leh tur pawh British player Kyle a ni a, tennis ngaina tak hnam kan nih avangin kan ram aṭanga player ṭha an rawn chhuak zel hian min ti lawm hle," tiin a sawi.

Inkhel dangah seeded pasarihna John Isner chu Gilles Muller lakah 3-6, 7-6 (18-16), 7-6 (9-7) in a chak lo. Muller hian Fernando Verdasco hnehtu Bernard Tomic a hmachhawn ve leh thung ang.

Feet 6 leh 10 inches zeta sang Isner hian a palenna hmang ṭangkaiin a service ṭhat hi a innghahna a ni ṭhin. Muller lakah pawh hian vawi 43 ngawt aces a siam leh a, mah se match point vawi 10 ngawt a hmu chu a chhawr ṭangkai theih loh avangin a tawpah chuan a chak lo zawkah a ṭang ta a ni.