Ronaldo leh Portugal tan fiahna

Portugal-in Euro 2016-a an match hmasa berah ram tenau Iceland 1-1 in an inhnehtawkpui a, chak lo thinrim Cristiano Ronaldo-a'n na takin Iceland a sawisel chhunzawm a, khelmual chhungah aiin pawn lamah a langsar.

Zanin dar 12:30-ah Portugal hian Austria an hmachhawn dawn a, Austria hi an match hmasa bera rin loh takah Hungary hneh lo ve tho an nih avangin hliam tuar team pahnih an inhmachhawn dawn - a hmuhnawm ang.

Group F inkhel tur dangah Iceland leh Hungary an inhmachhawn dawn a, he inkhela chak zawk zawk tan last 16 kawngka a inhawn zau dawn avangin team tenau pahnih hian khawvel barakhaih tumin an khel dawn.

Portugal vs Austria

Portugal coach Fernando Santos-a'n Iceland an hmachhawn ṭumin 4-1-2-1-2 formation a hmang a, tlarhmaah Nani leh Ronaldo inkawpin team tenau Iceland lakah goal khat chiah an khung.

Santos-a'n Austria lakah a formation ngai tho a hman rin a ni a, defensive midfielder Danilo Pereira chu Iceland an hmachhawn ṭumin inhliam mah se club training a zawm leh tawh a, Iceland laka inlante vek inlan leh tura beisei an ni.

Zanina Austria an hmachhawn hunah Cristiano Ronaldo-a'n en bik a hlawh leh dawn a, club khawvela player hlawhtling ber pawl hian inelna lianthamah Portugal tan a theihna tak tak a la pholang lo nia ngaih a ni. Kum 31-a upa forward tan Euro 2016 hi a record chhuanawm loh siamṭhatna remchang a ni.

Austria boss Marcel Koller-a'n chanchin lawmawm lo a nei a, a playmaker Zlatko Junuzovic chuan hliam vangin Portugal a hmachhawn thei dawn lo a, Werder Bremen midfielder hi group stage-ah a hmel kan hmuh a rinawm tawh lo.

Tlarhnungah ban rin-awm Aleksandar Dragovic chu Hungary an hma-chhawn ṭuma hnawh-chhuah a nih avangin a inlan thei dawn lo a, a tackling ṭha vanga hriat hlawh defender inlan lo tur hi Austria tan channa a ni.

Iceland vs Hungary

Hungary-in an match hmasa berah Austria 2-0 in an hneh a, an goal nawr a na tawk tih a chiang. Heithrual hian Iceland lah hi Ronaldo leh a pawlte dah bo thei khawpa tlar-hnung phui an ni thung - team pahnih hi an incho tawk khawp ang.

Iceland-in coach pa-hnih an nei a, coach pakhat zawk Lars Lagerback chuan, "Hungary hian qualifying round aṭang khan hma an sawn zel a, team ṭha tak an ni tawh. Austria kha team ṭha tak ni mah se Hungary-in an hneh kha thil makah kei chuan ka ngai lo," tiin an hmachhawn tur team a fak.

Swedish manager chuan Portugal an hnehtawk kha hna harsaah a ngai lo a, Hungary an hmachhawn tur chu a hautak zawk thu sawiin, "Harsatna lian tham hmachhawn kan la nei lo a, kan tana fiahna tak tak tur chu Hungary hi a ni," tiin hnehna chan ngei an tum thu a sawi.