NBA Finals Game 6 Golden State ngam loh LeBron James

LeBron James-a'n basketball thiam chungchuang bik a nih zia a pholang leh ta. Zirtawpni zing khan James hian Cleveland Cavaliers tan point 41 score-in Golden State Warriors lakah 115-101 in hnehna a chanpui a, 2016 NBA Finals best of seven series-ah 3-3 chiah a ni.

Quicken Loans Arena, Cleveland-a inkhelah Golden State tan match hmasa zawka hrem tuar Draymond Green a lo kir a, inrintawkna an neih belh tih a chiang. Mahse, James leh a team Cavs ten GSW lakah an huaisenzia an lantir a, inkhel bul ṭan aṭanga a tawp thlengin a chungnung zawkah an ṭang tluan thei.

James-a show

NBA Most Valuable Player atana vawi li thlan tawh James-a'n Game 5-ah point 41 score-in Cavs beiseina a chhem nung a, Game-ah ah pawh American power forward hi an team tana point score hnem bertu a nih bakah assist vawi 11 neiin rebound ṭum riat a la bawk. 2000 NBA Finals-a Shaquille O'Neal-a'n a zawna match hnih chhung point 40 a score tlin hnuah James hi hetiang dinhmun a ding leh thei hmasa ber a ni.

Kum 31-a upa James hi inkhel ti danglamtu a ni a, third quarter tawp lam leh quarter hnuhnung ber tir lama Cavs point score 18 chu James-a khung vek niin Golden Stae lakah hian dunk, steal leh layup ropui leh hmuhnawm tak tak a lantir.

Game 7 a ngahhlelh thu sawiin James chuan, "Khawvela team ṭha ber pahnih inkhel kan ni a, a zawna vawi hnih hnehna kan chang thei hi ka lawm tak zet. Tunah chuan match khat chiah khelh hmabak a awm tawh a, kan champion theihna tur a nih chuan ka thiamna leh theihna zawng zawng ka hmang ang," tiin a sawi.

Cavaliers coach Tyronn Lue chuan, "Khatiang kha James hnen aṭanga kan beisei chu a ni. Ani hi khatianga ṭha khan tun hma ṭangin a lo khel tawh ṭhin a, min ti beidawng ngai lo. Champion nomawi min chawi pui turin vawi khat dang leh chiah ṭha taka a khelh leh ngei pawh ka beisei," tiin James-a ho a NBA nomawi chawi ngei a inbeisei hle.

Warriors an fuh lo

Regular season-a match 73 zet hnehna chang thei Golden State hian Finals-ah 3-1 a hma an hruai fal hman avangin champion tlang tura ngaih an ni hman. Mahse, a zawna match hnih an chak loh tak avangin insiamṭhat an mamawh hle.

Warriors hian Game 6 inkhel bul ṭan aṭanga minute nga chhung point an score miah lo a, quarter hmasa berah 31-11 zeta hnufual zawkin tun season-a first quarter-a an point score tlem ber ṭum an tawng hial. Hei mai bakah hian point 11 an score hi NBA FInals chanchina first quarter bika team pakhatin point an score tlem ber a ni bawk.

NBA Most Valuable Player Stephen Curry a langsar tawk lo a, point 30 score-in an team tana thawhhlawk ber ni mah se American point guard hi a ṭan ulh avangin a inthunun zo lo a, basketball a khelh hnua a vawi khat nan hnawhchhuah (ejected) a ni hial.

Warriors coach Steve Kerr chuan a player duhlai Curry chungchang sawiin, "Steph hi MVP nilai a ni a, khatiang dinhmuna a ding ve hial kha a mak hle. Vawi ruk a foul ham a ni a, khang zinga vawi thum kha chu refree-te thutlukna dik loh vang chauh a ni. Kan la tlawm lo a, kan chak lo a la ni bik lo," tiin inrintawkna a la hloh lo.

Game 7...

Thawhṭanni zing dar 5:30 hian Golden State khelmual hman thiam Oracle Arena, Oakland-ah Game 7 khelh a ni dawn a, engkim chinfel a ni tawh dawn a ni.

NBA Finals chanchinah eng team mahin 3-1 a an hnufual hnuah hnehna an la chang let leh ngai lo. Mahse, James leh a hote hian beisei bo tawh tura ngaih kha beiseiawmah an siam thei a nih chuan tunhma lama midangin an tih theih ngai loh pawh hi an ti thei leh lo ang tih sawi lawk a harsa ta hle.