Ireland hmachhawn turin Belgium an inpeih

Champion tura rinkai Belgium-in an match hmasa berah Italy 2-0 in an hneh lo a, Marc Wilmots-a kaihhruai team hian zanin dar 6:30-ah Republic of Ireland an hmachhawn dawn.

Belgium-in an match hmasa berah chak result hlawh chhuak zo lo mah se coach Marc Wilmots chuan Ireland hmachhawn tura an inpeih tawh thu a sawi. Kum 47-a upa manager chuan, "Italy laka kan chak lohna aṭang khan kan insiamṭha tawh a, tunah chuan Ireland kan hmachhawn tur chiah kan ngaihtuah tawh a ni," a ti.

Player a nih laia Schalke midfielder ṭhin chuan sawi chhunzawmin, "Italy kan hmachhawn ṭum khan hmasawnna tur tam tak ka hmu a, mah se kha vang khan kan khel chhe chungchuang tihna a ni chuang lo. Kan match hmasa berah thil ṭha tak tak hmuh tur a awm tho a, chu chu kan theihnghilh tur a ni lo," tiin a eng zawngin a thlir.

Lukaku tel loin?

Belgium-in Italy an hmachhawn ṭumin 4-2-3-1 formation an hmang a, tlarhmaah Romelu Lukaku chu mal tlatin a hnung chiahah Kevin De Bruyne, Marouane Fellaini leh Eden Hazard an awm. Mahse, Belgium coach chuan a player remkhawm dan tih danglam a tum thu a sawi a, heng zinga langsar ber chu Everton striker Lukaku a ni.

Marc Wilmots chuan, "Romelu hian inkhel bul a ṭan leh dawn leh dawn loh ka sawi lawk thei lo a, player ka remkhawm dan hi ngaihtuah ṭhat a ngai a ni. Lukaku hian Italy kan hneh loh hnuah a inrintawkna a hloh thut lam a ni lo a, duhthlan tur player tam tak ka neih vang zawk a ni," a ti.

Belgium manager chuan sawi chhun-zawmin, "Ka striker dang ten training-naah an ti ṭha thei em em a, hun ṭha pek an phu a ni. He team hi Lukaku emaw player dang tupawha innghat kan ni lo a, kan tana pawimawh ber chu team anga kan khelh hi a ni," tiin player malin amah chauha team a hruai theih loh thu a sawi.

Brady a zam lo

Ireland-in an match hmasa berah Sweden hmachhawnin hnehna chang zo lo mah se an khel ṭha takzet a, Zlatan Ibrahimovic hoa khel team hi 1-1 in an inhnehtawk pui.

Norwich City winger Robbie Brady chuan, "Hlauh tur engmah a awm lo a, hlauh nei chunga he match hi hmachhawn tur kan ni lo. Belgium hi team ṭha tak an nih avangin hnehna chang turin an inbuatsaih ngei dawn a, keini pawh chumi tur chuan kan inbuatsaih a ni," tiin Belgium laka hnehna chan theih a inbeisei.

Mahse, Ireland tan Belgium laka chak hi thil awlsam tak a ni dawn lo - an intawn hnuhnung match rukah Ireland hian hnehna an la chang miah lo! Team pahnih in hmachhawn hnuhnung ber chu kum 1997 World Cup qualifier-ah khan a ni tawh a, Belgium-in 2-1 in hnehna an chang.

Ireland coach Martin O'Neill-a'n Swden an hmachhawn ṭumin 4-3-1-2 formation a hmang a, tlarhmaah Jonathan Walters leh Shane Long-te an inkawp. Sweden laka bench aṭanga tlan lut Robbie Keane-a'n Ireland tan inkhel bul a ṭan match hnuhnung 13-ah goal 11 a khung a, Tottenham Hotspur striker hlui hian Belgium lakah inkhel bul a ṭan a nih pawhin a mak lo ang.