Dunga chhantu Pele

Brazil legend Pele chuan tun hnaia Brazil-in coach aṭanga an ban tak Dunga a chhan a, Brazil captain hlui chu Copa America aṭanga Brazil tlak hma chhanah mawhphur vektu a nih bik loh thu a sawi.

Dunga enkawl Brazil hian USA-a khelh mek Copa America Centenario group stage-ah match khat chiah hnehna changin an tla a, Peru laka 1-0 a an tlawm aṭanga ni rei lo teah ban a ni.

Pele chuan, "Dunga hian a phu tawk aia nasain sawiselna a tawk a, ani chuan a hna ṭha takin a thawk a ni. Brazil national team hian pangngai taka training neihna hun pawh an nei tam lo a, chu mai niloin tournament apiangin team pumpui deuhthaw hi an thlak ziah a ni," tiin Dunga chu a chhan hle.

Corinthians coach Tite chu Dunga thlak tur anga sawi a ni a, kum 55-a upa manager hi official taka Brazil coach a nih thu puanzar la ni lo mah se a club enkawl president Roberto de Andrade chuan an manager hian Brazil football federation (CBF) sawmna a pawm tawh thu a sawi.

Pele chuan Tite chu Brazil tan coach ṭha tak a nih a rin thu sawiin, "Tite hi tun dinhmunah chuan Brazil coach ni tur khawpa theihna nei a ni a, hna ropui tak thawk turin finna a nei a ni. Dunga khan a team training pui nan hun a neih tam tawk loh avangin sawisel a ni kha a awm lo a, hetih rual hian thlak a ni dawn rau rau a nih chuan Tite hian Brazil coach nih a phu a ni." tiin Tite chuan Brazil coach thar nih a phu thu a sawi bawk.