Club lian pathumin Neymar lei an inhuam

Neymar-a agent Wagner Ribeiro chuan a player chu Barcelona-in a man an chhiar zat angin club pathum velin lei an huam thu a sawi a, a club sawite hi Paris Saint-German, Manchester United leh Real Madrid nia ngaih a ni.

Brazil captain contract-ah club-in an lei duh chuan pound maktaduai 157.99 an inhuam a ngaih thu ziah tel a ni a, heti zat hi Neymar-a agent sawi dan chuan club pathumin pek an inhuam.

Ribeiro chuan, "Khaw-vel club lian pa-thumin Neymar hi an team tana khel turin an duh a, a man zat pound maktaduai 157.99 pek pawh an inhuam a ni," a ti.

Neymar-a agent chuan thil dang erawh sawi chhunzawm duh loin, "Neymar hi club pathumin a man chhiar zatin an lei ngam tih loh chu thui tak a sawi theih lo a, engkim hi thuruk a ni. Tuna ka sawi theih chu Neymar hi Barcelona-ah a hlim tih hi a ni," tiin a striker chu a dah itawm vel thiam hle.