Ecuador hnehin US-in semifinal an lut

Copa America Centenario thlengtu United States chuan Clint Dempsey leh Gyasi Zardes te goal khung hmanga Ecuador 2-1 a hnehin semifinal an lut.

CenturyLink Field-a inkhelah USA coach Jurgen Klinsmann-a'n group stage match hnuhnung bera Paraguay 1-0 an hneh
ṭuma starting eleven aṭangin pakhat chiah a thlak a, defender DeAndre Yedlin hrem a nih avangin Matt Besler-a'n inkhel bul a ṭan ve thung.

US tan hian LA Galaxy forward Zardes chuan minute 22-naah Dempsey siam sak hmangin goal hmahruai a khung a, Premier League club Fulham tana lo vul tawh Dempsey hian second half-ah Copa America Centenario- a goal thumna ni turin he inkhela an goal hnihna a khung ve leh bawk. Ecuador tan Arroyo-a'n goal khat khung ve mah se a tawp thlengin a thlengtu US an chesual nawn tawh lo.

Second half ṭan hnu lawkah Manchester United midfiel-der Antonio Valencia chu Alejan-dro Bedoya a tihtluk avangin hnawhchhuah a ni a, US mid-fiel-der Jermaine Jones pawh Michael Arroyo a nem avangin hnawhchhuah zui ve nghal a ni.

Ram tana goal 52 khung tawhtu Dempsey chuan, "Mahni rama inkhel kan nih avangin min ṭantu an tam a, he hian boruak a ti nuam hle. Major tournament hi hun inkar hlat taka khelh ṭhin a nih avangin hnehna chan hi a hlu zual bik a, a bik takin kumina champion theih nih hi a châkawm," tiin an mahni ram ngei a hlawhtlinna chan a chak thu a sawi.

Ecuador coach Gustavo Quinteros hrem a nih avanga team enkawltu assistant coach Luis Suarez chuan, "Inkhel pumpui kha hlawm hnihin a ṭhen hran thei a, hun chanve hmalam khan US chan niin second half kha chu kan chan a ni ve thung. Anni khan goal khung theihna hunṭha vawi thum an neih
aṭangin ṭum hnih an khung thei a, keini erawhin vawi nga hun kan neih aṭangin vawi khat chiah kan khung thung," tiin an vanneih tawk loh thu a sawi.