Napoli-ah Hamsik a rinawm

Euro 2016 khelh meka Slovakia tana che ṭha tak Napoli playmaker Marek Hamsik chuan club dangin a rilru an lak pen loh thu a sawi a, Italian club tan khelh chhunzawm zel a tum. Kum 28-a upa Hamsik hian Russia 2-1 a an hneh ṭumin goal ropui a khung a, coach Jan Kozak chuan a player hi Napoli aia club lian zawka khelh a phu thu a sawi.

Mahse, season kaw chhung Napoli tana khel tawh midfielder chuan, "Napoli-ah hian kum hnih dang cham turin contract ka la nei a, ka hmalam hun chu he club-ah hian a awm a ni. Champions League khelh turin min hmuak a, thil ropui tak he club hian tih kan tum. Hmalam panin kan kal zel a, a aia sang zawk kan beisei zel a ni, " tiin Napoli chhuahsan a tum loh hmel hle.

Hetihrual hian Hamsik chuan ama thutluknaah chauh engkim a innghah loh thu sawiin, "Napoli hi chhuahsan duh lo mah ila thutlukna erawh keima kutah chauh a awm lo thung. Kei chuan chhuah lam ka ngaihtuah lo a, club pawhin min chhuahtir lam hi an ngaihtuah loh ka ring," a ti.

Slovakia-in Euro 2016 group stage-a an match hnuhnung ber England nen an khel dawn a, hnehna an chang thei a nih chuan last 16-ah hmun an chang chiang ang.

Hamsik chuan Eng-land nena an inkhel tur hi thlirlawkin, "Last 16 luh hi kan tum chu a ni a, England nena kan inhmachhawn tur hi kan tan chuan playoff ang a ni. A vawi khat nan kan ramin Euro kan khelh avangin nuam ka ti a, ka tan chuan tun hi hun duhawm bik a ni," tiin Euro 2016-ah cham chhunzawm zel an tum.