Copa America Centenario Champion rinkai Argentina, Chile leh Mexico inlan hun

Pathianni zing dar 4:30-ah Argentina leh Venezuela ten Copa America Centenario quarterfinal an khel dawn a, Lionel Messi-a'n inkhel bul a ṭan beisei a ni. Champion lai Chile leh Mexico te an inhmachhawn zui bawk ang.

Kum 23 hnua major tournament-a champion leh tum mek Argentina hi Copa America hnuhnung paliah vawi thum ngawt final lut mah se a vanduai zawkah an ṭang zel a, kumin hi an tan hun ṭha a nih ve tawh ngei an beisei.

Argentina vs Venezuela

Copa America Centenario quarterfinal leh semi-final-ah extra time khelh a ni dawn lo a, minute 90 hnuah an inhnehtawk a nih chuan penalty shootout hmanga chak zawk zawn nghal tur a ni. Final-ah erawh aṭul a nih chuan extra time khelh a ni ang. Hetiang a nih avang hian beisei loh result hmuh theih a ni.

Premier League striker goal khung thei leh hmuhnawm berte zinga mi Sergio Aguero pawh bench-a ṭhut tir a ngai a nih chuan Argentina tlarhmaa hmun chan harsat tur zia a chiang viau.

Captain Messi hi a dam ṭha a nih phawt chuan inkhel bul ṭan tur a ni a, Barcelona star hi hnungzâng na vangin Chile 2-1 a an hneh ṭumin inlan lo mah se Panama lakah goal thum a khung a, Bolivia 3-0 an an hneh ṭumin second half-ah a inlan bawk. Argentina tana goal khung hnem ber dawttu Messi (53) hian inkhel bul a ṭan theih tawh beisei a ni.

Kum dang angin Argentina hian goal khung an harsat lo tih a chiang tawh a, an chak tawk lohna
ṭhin goal venhim lamah pawh hma an sawn tih a lang. Match thum an khelh tawh aṭanga goal 10 khung tawhin an lamah vawi hnih chiah a la lut.

Manchester United defender Marcos Rojo leh Manchester City tlarhnung luahlumtu Nicolas Otamendi ten hliam tuar mah se Venezuela an hmachhawn theih beisei a ni a, midfielder Javier Mascherano pawh hi a ṭul chuan defence-ah pawh hman theih a ni bawk.

Serie A top scorer Gonzalo Higuain nek chhuak zo lotu Aguero chuan, "Tun hma lam khan Higuain nen hian kan lut rual fo a, nuam ti takin kan khel dun thei. Tuna kan coach hian pakhat zawk chauh a khelh tir a nih pawhin kan pawm thiam tur a ni a, team tan a ṭha ber tur chu kan ngaihtuah tlang tur a ni," tiin a sawi. City striker hi Chile leh Panama an hmachhawn ṭumin bench aṭangin a lut a, Bolivia lakah erawh minute 90 a inlan thung.

Kumin April thla aṭanga Venezuela enkawltu Rafael Dudamel-a kaihhruaina hnuaiah Venezuela hi tun hnaiah an khel ṭha rih hle a, match ruk an khelh tawh aṭangin vawi khat chiah chak loh neiin an ram chanchina a vawi hnih nan Copa America semifinal luh beiseina an nei mek.

Venezuela hian group stage-ah West Brom striker Salomon Rondon goal khung hmangin champion ngun ber Uruguay an hneh bakah Josef Martinez goal hmanga Jamaica hnehin Mexico chu 1-1 in an inhnehtawkpui bawk.

Chile tan fiahna

Argentina te inkhelh zawh zing dar 7:30-ah champion lai Chile leh khel ṭha tluang Mexico te Levi's Stadium, California-ah an inkhel chhunzawm ve nghal dawn a, chak zawk tur rinthiam a har hle.

Kumin January thlaa Juan Antonio Pizzi-a'n nikuma hlawhtlin puitu Jorge Sampaoli a thlak hnuah Chile hian beisei angin an la khel chhuak rih lo. Match sarih an khelh aṭangin vawi thum chiah an chak a, quarterfinal lut tur pawh hian minute 98-naa Arturo Vidal penalty chhuih luh hmangin Bolivia 2-1 in an hneh hram.

Bayern Munich midfielder Vidal chuan hmasawn an ngaih thu sawiin, "Mexico nen hian inkhel awlsam beisei chi a ni lo a, rilru leh taksa a inpeih a ngai. Kum 2004 hnulamah vawi hnih kan hneh ṭawk a, annin vawi thum min hneh tawh thung. Tun tournament-ah chuan keini aiin an team an ṭangrual ṭha zawkin a lang rih a, hneh tur chuan group stage-a kan khelh ang mai mai a kan khelh a thiang lo ang," tiin a sawi.

Hetihlai hian CONCACAF Gold Cup champion Mexico erawh an chak loh hnuhnung ber chu kum khat liam taa Ecuador 2-1 a an hneh loh daih tawh kha a ni thung a, hneh loh nei loa an kaltluan rei tawh em avangin inrintawkna an nei sang hle.

Mexico tana goal 45 khung tawhtu Javier Hernandez chuan, "Football-ah chuan goal khung tuma in nawr hi a nuam a, Chile lak pawh goal khung ngei turin kan thawk chhuak ang," tiin a sawi.

Bayer Leverkusen striker Chicharito hi an ram chanchina goal kung hnem ber dawttu a ni a, goal khat dang a khung leh a nih chuan Jared Borgetti record goal 46 a nih rual tawh dawn a ni.