France hmachhuan Payet Platini 1984, Zidane 1998, Payet 2016?
France-in 1984 European Championship an thlen ṭum khan Michel Platini chu inelna thlengtu tan 'hero' a ni a, Juventus legend hian goal kua khungin inelna lian thamah France chu a vawi khatna atan a champion pui. Kum 1998-ah France-in Zinedine Zidane a kaihhruaina hnuaiah an ramah FIFA World Cup an champion leh bawk a, Zidane leh Platini hi football hmanga France tana pasalṭha an ni.
Payet 2016
Zidane-a'n FIFA World Cup a champion hnuah European Championship-ah nomawi a chawi pui lehnghal a, football ram ropui zingah France tel mah se tun hnaiah erawh an result aiin team chhung buaina a langsar ṭhin zawk. Kuminah France-in Europe ramte inelna lian an thleng a, hming langsar tam tak zinga sawi zui hlawh bik chu Dimitri Payet a ni. West Ham midfielder hian match hmasa pahnihah goal mawi bik khung ve vein Platini leh Zidane te nen huang khatah an sawi tel ṭan a, amaherawhchu Payet erawh France legend te nena khaikhin tur em chuan an ram hi knockout stage chiah a thlen pui.
Pathianni zan
France-in an group stage match hnuhnung berah Swizer-tland an hmachhawn dawn a, last 16 lut chiang tawh mah se group hmahruaitu ni tur chuan point khat tal an hlawhchhuah a ngai. Swiss erawh point an hmu lo a nih chuan Romania-in an um phak theih avangin chetsual a thiang lo a, Pathianni zan dar 12:30-a Group A match hnuhnung ber pahnih khelh tur hi a hmuhnawm ang.
Hammers midfielder Payet-a'n a zawnin man of the match vawi hnih a dawng tawh a, Euro 2016 bikah chuan France midfield-ah a langsar ber tawh.
Swizertland nen
Payet a lansarh laiin N’Golo Kante a pawimawh thung. Leicester City midfielder leh Olivier Giroud ten yellow card an hmuh avangin Pathianni zan hian an aiah Yohan Cabaye leh André-Pierre Gignac te an lut a nih pawhin a mak lo ang. Last 16 an luh chian tawh avangin Patrice Evra leh Blaise Matuidi te aiah Lucas Digne leh Moussa Sissoko te an lut thei bawk.
Les Bleus hian Euro 2004 group stage-ah Swizertland hi 3-1 in an hneh a, 2014 World Cup group stage-ah 5-2 in an hneh bawk. Competitive match-ah vawi nga intawng tawhin Swizertland hian chak hmel an hmu lo a, ṭum thumah erawh chak zawk an awm lo.
Switzerland lamin Arsenal lak thar Granit Xhaka an nei a, Bayern Munich-a beisei phak ta lo Xherdan Shaqiri pawh ram tan chuan danglamna thlen thei player a ni. Manchester United nena sawi zawm striker Breel Embolo-a'n hmabak a nei êng a, vannei taka match hnih khelha point ruk hlawhtu France laka chak lo tura dah ngawt chi an ni lo.
Romania beiseina
Vawi 16 an inhmachhawn tawhah Romania-in Albania vawi 10 an hneh a, vawi hnih chiah an chak lo. Competitive match bikah chuan Albania-in chak hmel an la hmu lo a, vawi riat inkhelah Romania hi vawi ruk chakin vawi hnih an inhnehtawk.
Ningani khan Albania coach Gianni De Biasi chuan a kum 60 piancham a lawm a, hemi ṭuma a duhthusam a sawi chu 'Romania hneh' a ni. Amaherawhchu chak tur chuan goal khung a ngai a, Albania-in goal an la khung loh laiin Romania attacking midfielder Bogdan Stancu chuan penalty aṭangin goal hnih a khung tawh.
Romania hian point thum an hlawhchhuah a, France-in Swizertland an hneh bawk chuan Anghel Iordanescu hote hian pahnihna ni chunga last 16 luh theih dan kawng an nei.