Wales hnehtu Hodgson a hlim

England-in minute 91-naa Daniel Sturridge-a goal hmangin Wales 2-1 in an hneh a, Euro 2016 last 16 luh beiseina an nei sang ta hle. England manager Roy Hodgson chuan Daniel Sturridge-a goal ang em em a lawm nasat a neih lohna a rei tawh thu a sawi a - hei hian England lawmna a hrilhfiah chiang ber awm e.

Kum 68-a upa Eng-land manager chuan, "Kei leh ka coaching staff-ten khatiang taka hlimna ang kha kan neih lohna a rei ta hle. I hun ṭha neih i chhawr loh hnua goal i chhuah bawk hnua i substitute pahnihten goal an khung a nih bawk chuan i hlim ve tho ang," tiin an hlimna awmzia a sawifiah.

Hodgson chuan Wales manager Chris Cole-man a khawngaih thu sawi nghalin, "Coleman leh Welsh team ka khaw-ngaih takzet a ni. Hun pek belha Russia laka kan goal chhuah ṭuma ka rilru hrehawmzia kha ka ngaihtuah let a, Coleman-a rilru tur hi ka hriatthiampui a ni," a ti.

England leh Wales inkhelah khan England-in 70% ball an chang a, Wales goal-ah vawi 20 shot neiin an khingpui team hian vawi riat chiah shot an nei thung!

Inkhel thlirletna

England manager Roy Hodgson chuan Wales nena an inkhel thlirletin, "Wales hmachhawn dawn khan starting XI-ah tu nge kan luhtir ang tih kan ngaihtuah nasa a, artui vaw keh tura tiang lian tak hman nghal kher a
ṭulna ka hriat loh avangin players ṭhenkhat ka dah
ṭha a ni," tiin Jamie Vardy leh Daniel Sturridge-te inkhel bul a ṭan tir loh chhan a sawi.

Wales boss Chris Coleman chuan, "Roy ka lawmpui a ni. Substitution awmze nei a siam a, min nawr let ang tih hi chu kan rin dan sa a ni. Kan inkhel thlir khan hun tam zawkah chuan kan ṭha zawk a, ball kan chang tlem zawk chungin ka hlauthawng lo. Mahse, anni chuan Sterling leh Kane lachhuakin Vardy leh Sturridge an luthir thei a ni," tiin player an inthlauh thu a sawi.

Players thukhawchang

England chakna goal khungtu Daniel Sturridge chuan, "Ram ropui tak hmachhawnna inkhela England tana ka inlan thei kha ka lawm a ni. Match khat kan la hmabak a, lawm uchuak loh hram ka tum - mah se, chu chu a harsa a ni. Hetiang ang hun duhawm hi tawn zen zen theih a ni lo a, kan chak nana tha ka thawh hi ka lawm a ni," tiin a hlim hle.

England striker Jamie Vardy chuan, "Inkhel bul ṭan kan duh vek a, mah se team game a ni tih kan hre reng tur a ni. Player 23 kan awm a, khelmuala tlan luta danglamna ka thlen thei kha ka lawm a ni. Halftime-a kan thu inchah chu inkhelh dan ngai rengin khel ula, goal chu a lo kal mai ang tih hi a ni," tiin danglamna thlen tura thu ropui leh danglam an inhrilh loh thu a sawi.