Atletico player thar Gaitan

Spanish club Atletico Madrid chuan season thar aṭanga an player ni turin Nicolas Gaitan chu Benfica ṭanga pound maktaduai 19.7-a lakluh an remti a, kum 28-a upa midfielder hian Argentina tan Copa America-a khelh zawhah Atletico zawm turin Madrid khawpui a pan ang.

Manchester United nen pawha sawi zawm hlawh tawh midfielder hian kum 2010 khan Boca Juniors aṭangin Benfica a pan a, Portuguese club-a a cham chhung hian league nomawi vawi thum chawipuiin Europa League-ah final vawi hnih a luhpui bawk.

Benfica tan season ruk a khelh chhungin inelna hrang hrangah match 253 a inlan a, goal 41 a thunsak. Season hman zawh takah khan inelna hrang hrangah match 37 khelin goal 11 a khung a, Champions League bika vawi riat a inlanah goal li khungin a ṭhiante thun tur vawi li a siam sak bawk.