United-in player hralhna tur zawng

Manchester United-in player thar an melh a, an kawlsa tih ral dan an ngaihtuah bawk. Premier League match tawpnaa goal khungtu Jesse Lingard leh Brazilian midfielder Andreas Pereira te chu an hralh tum zinga mi an ni.

Solskjaer hian Ajax aṭangin Donny Van de Beek an lalut hnai ; centre back, right wing leh forward an la melh. Hemi a nih avang hian season liam taa khelhna hmun chang tam lo Lingard leh Pereira te chhuak tura an sawi hi a mak hran lo.

Kum 27 mi Lingard hian khelmual pawn leh chhungah harsatna a tawk a, chutihrualin season liam ta khan inelna hrang hrangah match 40 a inlan pha tho. English midfielder hian match tawp bera Foxes laka a khung chu Premier League-a a goal chhung awmchhun a ni.

Pereira pawh hi Lingard ang thoin kum 27 mi a ni a, season ṭantirh lamah inlan tam mah se Mason Greenwood leh January thlaa an lakluh Bruno Fernandes vangin season tawp lamah khelhna hmun a chang tam lo.

Brazilian midfielder hian kum 15 niin kum 2011 khan United hi a zawm a, February thlaa Club Brugge nen an inhnehtawk hnuah bul a ṭan tawh lo.

Manchester United hian AS Roma aṭangin Chris Smalling dilna hmuh an inbeisei mek a, English defender hi an hralh thei a nih chuan Solskjaer-a hote tan defender thar lakluh a awl sawt ang. United hi RB Leipzig defender Dayot Upamecano nen sawizawm an ni leh tawh a ni.